نورستان کې لسګونه بزګران او بڼوال وروزل شول
١٨ لیندۍ ۱۴۰۲ه.ش
٢٦جُمَادَى الأول ۱۴۴۵ ه.ق
د نورستان ولایت دکرنې، اوبولګولو او مالدارۍ ریاست د ملګرو ملتونو د پراختیایي ادارې په مالي او د کاواک مؤسسې په تخنیکي همکارۍ ددې ولایت په مرکز پارون او کامدېش ولسوالی کې د بزګرانو سیمه ییزو ښوونځیو له لارې ١٨٤ بزګر او بڼوال روزلي دي.
ددغو روزنیز پروګرام په ترڅ کې یادو بزګرو او بڼوالو ته د نوې او عصري ماشینرۍ کارونې او د بڼونو ناروغیو مخنیوی په اړه په عملي او نظري ډول زده کړې ورکړل شوي دي.
د نورستان د کرنې ریاست چارواکي وویل، چې ددغو روزنیزو پروګرامونو په ترڅ کې ګډونوالو ته د عصري بڼونو جوړلو، اوبولګول، آفاتو او ناروغیو کنترول، ښاخبرۍ، حاصل ټولول او مارکیټینګ برخه کې فني او مسلکي زده کړې ورکړل شوي دي.
له دغو روزنیزو پروګرامونو څخه برخمن شوي بزګر او بڼوال له دې پروسې څخه خوښي وښودل او راتلونکي کې یې هم د کرنې ادارې څخه په دې برخه د دوامداره همکاریو غوښتنه وکړه.
