ننګرهار کې نږدې ۱۳۰ زره څارویو ته د واکسینونو پلي کولو چارې پیل شوې

١۵ لیندۍ ۱۴۰۲ه‍.ش
۲۳جُمَادَى الأول ۱۴۴۵ ه‍.ق
د ننګرهار د کرنې، اوبولګولو او مالدارۍ ریاست په هڅو د افغانستان لپاره د هالینډ کمیټې له لورې په ۲۱ ولسوالیو دره نور، حصارک،  شېرزاد، خوږیانو،  سرخ رود،  پچیراګام، رودات، هسکه مېنه، کوټ، اچین، نازیان، شینوارو کوزکونړ، کامه، مومندره، بهسود، لعلپوره، ګوشته، سپین غر او دور بابا کې وړو شخوند وهونکو څارویو ته د لیونتوب او انترکس  واکسینونونو د تطبیق لړۍ پیل شوې ده.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې د هالینډ کمیټې له لورې د ۳۰ زره ډالرو په ارزښت  ۱۲۹ زره او ۲۲۵ ډوزه واکسینونه وړو شخوند وهوونکو څارویو ته پلي کېږي. 
د ننګرهار دکرنې رییس وویل، چې یادو واکسینونو کې  به  ۹۲ زره او ۱۲۵ دوزه د څارویو دلیونتوب ناروغۍ او ۳۷ زره او ۱۰۰ دوزه به د انترکس ناروغي واکسینونه تطبیق شي.
دغه راز یادو واکسینونه په وړو څارویو کې د ناروغیو مخنیوی او د څارویو لرونکو اقتصادي ستونزو د حل په موخه ترسره کېږي.
وړاندې تردې هم د هالینډ کمیټې له لورې دننګرهار په بېلابېلو ولسوالیو کې زرګونه څارویو ته د  لېونتوب واکسینونه تطبیق کړي؛ او په راتلوونکي کې به هم یاد واکسینونه تطبیق شي.