د میکانیزه کرکېلې ترویج په موخه د کندز څېړنيز فارم کې لیزر لېول پلي کېږي
١٣ لړم ۱۴۰۲ه.ش
٢٠ ربیعالثاني ۱۴۴۵ ه.ق
د کندز ولایت د کرنې، اوبولګولو او مالدارۍ ریاست د کرنیزو څېړنو د لوی مدیریت فارم د څېړنیزو فعالیتونو د ښه پلي کیدو او د میکانیزه کرکیلې د ترویج په موخه لیزر لېول کېږي.
د کندز د کرنې ریاست دکرنیزو څېړنو لوی مدیر عبدالمتین عظیمي په هڅو او د کندز ولایت د کرنې، اوبولګولو او مالدارۍ رییس الحاج مولوي امان الله حسن په همکارۍ د کرنیزو څېړنو د لوی مدیریت ځمکې د کرنې څیړنې د تجربو او څطړنیزو برنامو د ښه پلي کولو لپاره چې د کرنې اصل او اساس ده لیزر لېول کېږي.
د کندز ولایت د کرنې، اوبولګولو او مالدارۍ ریاست مرکزي څېړنیز فارم په شمال ختیځ زون کې یو له مهمو فارمونو څخه دی، چې هر کال په کې د تېلي او صنعتي بوټو، غله جاتو، حبوباتو او سبو په ګډون بېلابېلې څېړنې ترسره کېږي او ښې پایلې یې د اګرانومیکي سپارښتنو وروسته د ترویجي څانګو له لارې بزګرانو ته په واک کې ورکول کېږي.
د څیړنېزو تجربو سربېره د هستوي او مورني تخمونه همداشان تولید، او د پاکولو، د لابراتوار د آزمایښت وروسته د کرنې محترم وزارت د مقام د طرزالعمل سره سم، د کرنیزو تخمونو دولتي شرکت آمریت او هغه خصوصي شرکتونه چې د بنیادي تخمونو د تولید جواز لري د ټاکل شوي بیې په بدل کې ویشل کیږي.
د کرنیزو اصلاح شویو تخمونو او اګرانومیکي کړنو چې د کرنیزو محصولاتو د زیاتوالي له اصلي عواملو څخه دي، د ځمکې اصلاح هم د پرمختللو ماشینونو او ټیکنالوژیو پرمټ کېږي.
