هلمند ته دکرنې وزارت دکرنېزې میکانیزې رییس سفر
دکرنې، اوبولګولو او مالدارۍ وزارت د کرنیزې میکانیزې رییس او ورسره مل پلاوي هلمند ته د خپل سفر په ترڅ کې ددې ولایت د کرنې، اوبولګولو او مالدارۍ رییس مولوي نظرمحمدصدیقي سره وکتل.
دکرنې وزارت د کرنیزې میکانیزې رییس هلمند ولایت ته دخپل سفر موخه په دې ولایت کې دکرنیزو وسایلو ارزونه، د نوې او عصري ماشینرۍ په برخه کې د اړتیاو تشخیص او په دې برخه کې د ادارې د ستونزو او وړاندیزونو اورېدل وبلل.
په دې لیدنه کې دهلمند دکرنې رییس د کرنې وزارت دکرنیزې میکانیزې رییس ته په یاده برخه کې د شته امکاناتو په اړه معلومات ورکړل، هغه همدارنګه په دې ولایت کې د بزګرو او بڼوالو لپاره د نویو او عصري ماشین الاتو د برابرولو غوښتنه وکړه، ددې ترڅنګ یې د هغو ماشینریو چې دا مهال د هلمند ولایت د کرنې ریاست په واک کې دي د ښې او موثرې ګټې اخیستنې ډاډ ورکړ.
په ورته وخت کې دکرنې وزارت د کرنیزې میکانیزې رییس ژمنه وکړه، چې هلمند ولایت ته به په دې برخه کې خپله پاملرنه لا زیاته کړي ترڅو بزګر د دودیزې کرکیلې پرځای نوې او پرمختللې کرنې ته ور وګرځي.
