د ننګرهار کانال شرکت کې د زیتونو حاصلاتو زیاتوالي په پار هڅې

د ننګرهار کانال شرکت چارواکو ددې شرکت اړوندو فارمونو کې د زیتونو ونو او حاصلاتو زیاتوالي په پآر هلې ځلې ډېر کړي دي، چې ددغو هلو ځلو په دوام ددې شرکت اړوند د درېيم فارم شپږم بلاک په ۳۴ نمره ځمکه کې ۱۸۰۰ زیتونو بوټو ناغه ګیري بشپړه شوه.
د ننګرهار دکانال شرکت رییس مولوي غلام الرحمن کظیم وویل:«د درېيم ( غازي اباد ) فارم ټولټال شپږ بلاکونه  لري، شپږم بلاک ۳۴ نمره ځمکه يې کابو ۱۱۶نیم جریبه ځمکه لري، دغه ټوله ځمکه د اصولو او قانوني پړاوونو وروسته سپین غرعابد شرکت ته په اجاره ورکول شوې ده.» 
د ښاغلی کظیم په خبره د دې فارم ټوله ځمکه د اګرونومیکي ځانګړنې او اقلیمي شرایطو له مخې په کال کې د درېو فصلونو د کښت وړتیا لري، چې زیتون او ستروسو سربېره، غنم، شولې، ګڼي، جوار، خټکي، هندواڼي، حبوبات او نورو صنعتي نباتاتو کر کېلې ته مساعده ده.  
 په همدې حال کې د ننګرهار کانال شرکت د درېيم فارم امر انجنیر قیس الله وویل: «دغه ټول ۱۸۰۰ زیتون بوټي د درېيم فارم په سترې قوريي کې روزل شوي، دې بوټو ته کندې ویستل درېيم فارم پرسونل ویستلي، ددی بوټو ساتنه، ابیارۍ، سره ، درمل، د قوريي نه بوټو راانتقال، دمزدور روزمزد او نور ددی شرکت په غاړه ده، کابو یو نیم میلیون افغانۍ لګښت پرې راغلی دی.»
د یادونې ده، چې انقلابي، ناسازه شرایطو او جنګونو د ننګرهارکانال شرکت د درېيم فارم ټولټال ۱۶۶۵ جریبه ځمکې باندې ولاړ زیتون بڼونه تخریب کړي، چې له ښه مرغه اوس يې بیا ځلې احیا او احداث ته ننګرهار کانال شرکت رهبرۍ مټې رانغاړلي، چې ورسره به د زیتونو په حاصلاتو کې د پام وړ زیاتوالی راشي.