هلمند کې د انجې ترویج په پار هڅې
د هلمند ولایت د کرنې، اوبولګولو اومالداري رياست، د طبيعي سرچينو امریت اړوند په بولان مرکزي قوريه کې د طبي بوټي هنګ (انجې) کرلو چارې پیل شوي دي.
د یادې پروسې په لړکې به په شاخوا دوه نیم جریبه ځمکه کې د انجې ٢٥٠٠٠٠ اصله بوټي په فني او مسلکي ډول وروزل شي چې راروان ١٤٠٣ کال ته به د ځانګړې کړنلارې له مخې پر بزګرو ووېشل شي.
د چارواکو په خبره د انجې بوټي ډېرو کمو اوبو ته اړتیا لري نو ددې ولایت له خاورې، اوبو او هوا سره ښه مطابقت کوي.
انجه داسې بوټی دی، چې د طبي موخو لپاره کارول کېدای شي، د کورني بازار تر څنګ نړیوال مارکېټ لري او په لوړه بیه پلورل کېږي.
د هلمند دکرنې، اوبولګولو او مالدارۍ ریاست په دې ولایت کې د بزګرانو د ملاتړ او د کوکنارو د کرکېلي د بدیل پیداکولو په پار تل هلې ځلې کوي تر څو بزګرو ته نوي ارزوښت لرونکي نباتات ترویج او تکثیر کړي.
