زابل کې د اوبولګولو د یوې پروژې چارې پیل شوې

د زابل د کرنې، اوبولګولو او مالدارۍ ریاست ددې ولایت د ترنک او جلدک ولسوالی د شوخک کلي کې د اوبولګولو د یوې پروژې رغنیزې چارې پیل  کړي دي.
په دې اړه جوړه شوې غونډه کې د زابل ولایت د مقام د دفتر رییس حافظ عتیق، دکرنې رییس مولوی عطاءالله راشد، د اقتصاد رییس حاجي امیر او یوشمېر سیمه ییزو چارواکو شتون درلود.
د زابل دکرنې رییس مولوی عطاءالله وویل، چې دغه سربند د کرنې وزارت له بودیجې څخه د ۳.۵ میلیونه افغانیو په لګښت رغول کېږي.
 د زابل دکرنې رییس وویل، چې ددې پروژې په بشپړېدو سره به سلګونه جریبه کرنیزه  ځمکه  خړوبه او زرګونو خلکوته به د کار زمینه هم برابره شي.
په همدې حال کې د سیمې اوسیدونکو د یاد سربند په جوړیدو خوښي وښوده او د زابل د کرنې، اوبولګولو او مالدارۍ ریاست او پروژی له مسولینو څخه مننه وکړه.
ددې پروژې د پلي کولو موخه د بزګرانو کروندو ته پر وخت او کافي اوبه رسول، د ځمکې لاندې اوبو پیاوړتیا او په ټوله کې د اوبو مدیریت دی.