په لوګر کې د څه باندې ۴۴ زره ډالرو په ارزښت یو کانال ګټې اخیستنې ته وسپارل شو
۲ تله ۱۴۰۲ه.ش
۹ ربیعالاول ۱۴۴۵ه.ق
د لوګر په محمدآغې ولسوالی کې د څه باندې ۴۴ زره امریکایي ډالرو په لګښت د اوبو رسونې د یو کانال چارې بشپړ او ګټې اخیستنې ته وسپارل شو.
د لوګر د کرنې، اوبولګولو او مالدارۍ ریاست د طبیعي سرچینو آمر انجنیر نصرالدین بهیج وویل؛ د شاخ قند کانال، چې د محمدآغې ولسوالی اړوند د سفیدسنګ کلي کې د کرنې، اوبولګولو او مالدارۍ ریاست له خوا د سولې بنسټ مؤسسې په مالي ملاتړ په پاخه او اساسي ډول جوړ شوی، ۱۲۰۰ متره اوږدوالۍ لري.
د نوموړي په خبره؛ د یاد کانال له جوړېدو سره به له یوې خوا سلګونه جریبه کرنیزې ځمکې خړوبې او په ورته وخت کې به د اوبو له ضایعاتو څخه په ښه توګه مخنیوی وشي.
