پکتیکا کې ۲۸۰ اړمنو کورنیو ته د هګیو چرګانو واړه فارمونه جوړېږي

۲۰ وږي ۱۴۰۲ه‍.ش
۲۵ صَفَرُ المُظَفَّر ۱۴۴۵ه‍.ق
د پکتیکا د کرنې، اوبولګولو او مالدارۍ ریاست په هڅو د پکتیکا په چهار بران ولسوالی کې په اسیا کې د ټولنیزو خدماتو نړیوالې موسسې په تخنیکي همکارۍ ۲۸۰ تنو هغه مېرمنو  ته چې د کورنۍ د د نفقې پیداکولو مسولیت ور تر غاړي دي، د دوی د اقتصادي پیاوړتیا په پار دوی ته د چرګانو واړه فارمونه جوړیږي.
د پکتیکا دکرنې، اوبولګولو او مالدارۍ ریاست وایي، چې  هرې ګټي اخیستونکې  ته به ۳۰ قطعې کورني چرګان، د چرګانو دانه، مرغانچي وسایل،  ابخوري او دانه خوري هم ورکول کېږي.
د چارواکو په خبره د چرګانو د ورکړي موخه دا ده ترڅو په کور دننه بېوزله کورنیو ته د کار زمینه هم برابره شي؛  ترڅو د خوړو خوندیتوب رامنځته او کورنۍ پر ځان بسیا شي.   
دغه راز یادو کورنیو ته د چرګانو پاللو،  ناروغیو مخنیوي  د واکسینونو تطبیق کولو او ګڼو نورو برخو کې روزنه هم ورکول کېږي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.