نورستان کې د ځنګلونو خوندیتوب په پار هڅې
۲۵ زمری ۱۴۰۲ه.ش
٢۹ مُحَرَّمُ الحَرام ۱۴۴۵ه.ق
د نورستان د کرنې، اوبولګولو او مالدارۍ رياست په دې ولایت کې د ځنګلونو خوندیتوب او پراختيا په پار هڅې پیل کړي دي.
په همدې موخه د نورستان د کرنې، اوبولګولو او مالدارۍ رییس مولوي سلیمان ایمن او ورسره مل پلاوی ددې ولایت برګمټال ولسوالی ته د سفر په ترڅ کې ددې ولسوالی له لسوال، سیمه ییزو چارواکو او له ولسونو سره د ځنګلونو د پرېکولو د مخنیوي په پار ناسته وکړه.
په دې ناسته کې د نورستان د کرنې، اوبولګولو او مالدارۍ رییس مولوي سلیمان ایمن د نوموړې ولسوالی قومي مشرانو ته د ځنګلونو تولیدي او محافظوي ارزښت بیان کړ.
ښاغلی ایمن طبیعي ځنګلونه د هېواد ملي شتمني او له منځه وړل یې جرم وګڼل، هغه له قومي مشرانو او سیمه ییزو چارواکو څخه وغوښتل، چې د خپلې اړوندې سیمې د ځنګلونو د پریکولو په مخنیوي کې قومي ناغو او هوکړه لیکونو ته د پخوا په شان دوام ورکړي.
همداراز نوموړي قومي مشرانو ته په یادو کلیو کې د ځنګلونو د ساتنې او تنظیم لپاره د ځنګلدارۍ ټولنو د ایجاد خبره وکړه.
په ورته وخت کې قومي مشرانو د قومونو په استازولي د نورستان د کرنې رییس ته ډاډ ورکړ چې ځنګلونه به نه قطع کوي او د سر غړونکو په پېژندلو کې به همکاریو ته دوام ورکوي.
