د هلمند دکرنې ریاست: نوزاد ولسوالی کې د التیګي کاریز رغنیزې چارې پیلېږي
۲۳ زمری ۱۴۰۲ه.ش
۲۷ مُحَرَّمُ الحَرام ۱۴۴۵ه.ق
د هلمند ولایت د کرنې، اوبولګولو او مالدارۍ رییس الحاج مولوي نظرمحمد صدیقي د سورصلیب نړیوالې ادارې د اقتصادي برخې مسؤل ښاغلي حسین ابراهیم رسول سره په کتنه کې پر بېلابېلو موضوعاتو خبرې اترې وکړې.
دیادې لیدنې په ترڅ کې ښاغلي رسول په دې ولایت کې د کرنې په برخه کې د نوزاد ولسوالی اړوند التیګي کاریز د ځینو برخو په اساسي ډول رغونې، د یاد کاریز د پاکولو او د سیمې خلکو ته د کاري زمینې برابرولو د پروژې د پیل په اړه لازم معلومات وړاندې کړل.
نوموړي وویل یاد کاریز چې شاوخوا ١٧٧٤ متره اوږدوالی لري د بشري ځواک پر مټ به پاک کاري او ځینې سیمې، چې د یاد کاریز په مسیر کې ودانیزو چارو ته اړتیا لري، په اساسي ډول ورغوي، چې په یاده پروژه کې به سلګونه سیمییزو کسانو ته د کار په مقابل کې نغدې پیسې ورکول کېږي .
د هلمند دکرنې رییس د سور صلیب نړیوالې ادارې د اقتصادي برخې مسوول حسین ابراهیم رسول ته په دې ولایت کې د کار کولو په برخه کې د بشپړې همکارۍ ډاډ ورکړ او ويې ویل :«داچې د هلمند ولایت د شمالي ولسوالیو کاریزونه او د اوبو ویالې اساسي رغولو ته اړتیا لري، په دې برخه کې د هر ډول کاري اسانتیاوو په برابرولو کې کرنې ریاست د ولایت محترم مقام سره په همغږۍ د سورصلیب نړیوالې ادارې سره همکارۍ ته چمتو دی تر څو د اوبو د مدیریت په برخه کې اساسي او بنیادي نوښتونه رامنځته شي.»
د هلمند دکرنې رییس د خپلو خبرو په دوام وویل، څرنګه چې هلمند ولایت د نورو ولایتونو په پرتله سخت ځپل شوی دی، د ولسونو ضرورتونه او اړتیاوې هم زیاتې دي، نو اړینه ده چې ددې ولایت د کرنیز اقتصاد پیاوړتیا په برخه کې اغېزناکې اقتصادي پروژې پلي شي چې د اړتیا په صورت کې کولی شو د مهمو او بنیادي پروژو وړاندیزونه درسره د تمویل په موخه شریک کړو.
وروستیو کې ښاغلي رسول د هلمند دکرنې رییس سره ژمنه وکړه، چې د هلمند په ولایت کې به د یادې پروژې په دوام هڅه وکړي ترڅو نورو مهمو برخو کې هم داډول کارونه پلان او سرته ورسوي.
