چک او دایمیرداد ولسوالیو کې د غنمو له ننداریزو قطعو څخه لیدنه وشوه

۱۵ غویی ۱۴۰۴ ه‍.ش
۷ ذُو ٱلْقَعْدَةِ ۱۴۴۶ه‍.ق
د میدان وردګو ولایت د کرنې، اوبولګولو او مالدارۍ ریاست پلاوي د چک او دایمیرداد ولسوالیو اړوند سیمو کې له هغو ننداریزو قطعو څخه لیدنه وکړه چې د غنمو د ښه حاصل د هڅونې لپاره جوړې شوې دي.
د کرنې رئیس الحاج مولوي نیازمحمد عابد د یاد ریاست له یو شمېر مسلکي کارکوونکو سره یوځای د چک ولسوالۍ د بندي چک ساحې او د دایمیرداد ولسوالۍ اړوند د بابک کلي نمایشي قطعو څخه لیدنه وکړه. دغه قطعې د کرنیزو خدمتونو عمومي مدیریت په همغږۍ د ۱۴۰۴ کال د وري میاشتې په ۱۵مه نېټه کرل شوې وې.
د یادو نمایشي قطعو د کښت پر وخت، هر بزګر ته د هرې قطعې لپاره ۱۲ کیلوګرامه د غنمو اصلاح شوی تخم، ۱۲ کیلوګرامه ډاپ سره او ۶ کیلوګرامه یوریا ورکړل شوې وه. د کرنې مسؤلینو وویل چې د کروندو عمومي وضعیت ښه دی، خو ځینې ستونزې لکه هرزه بوټي هم لري.
د کرنې رئیس مولوي نیازمحمد عابد بزګرانو او کرنیزو کارکوونکو ته د هرزه بوټو د مدیریت، پر وخت اوبو لګولو او سرې ورکولو په اړه مفصلې لارښوونې وکړې. نوموړي ټینګار وکړ چې باید هرزه بوټي له کروندې وویستل شي او په یوه لري او ځانګړي ځای کې تر خاورو لاندې شي، څو یې تخمونه بیا زرغون نه شي.
نمایشي قطعې د دې لپاره جوړېږي چې بزګرانو ته د نوې ټکنالوجۍ، اصلاح شویو تخمونو او مناسبو کرنیزو میتودونو اغېزې عملي وښودل شي. دا بهیر له تېرو کلونو راهیسې د کرنې وزارت تر چتر لاندې په بېلابېلو ولایتونو کې ترسره کېږي. بزګرانو د کرنې له ریاست مننه وکړه او د ورته نورو نمایشي قطعو د جوړولو غوښتنه یې وکړه.