میدان وردګو کې د کانګو ناروغۍ د مخنیوي کمپاین؛ د څارویو پلورونکو او قربانۍ اخیستونکو ته عامه پوهاوی ورکړل شو

۴ غبرګولي ۱۴۰۵ ھ.ش
۸ ذُی الحجه ۱۴۴۷ هـ.ق
د میدان وردګو ولایت په مرکز میدان ښار کې د لوی اختر د رارسېدو په مناسبت د وینه بهېدونکې تبې (کانګو) ناروغۍ د مخنیوي او کنټرول په موخه د عامه پوهاوي پراخ کمپاین ترسره شو، چې په ترڅ کې یې د څارویو پلورونکو، مالدارانو او د قربانۍ لپاره د څارویو اخیستونکو ته اړینې روغتیايي سپارښتنې وړاندې شوې.
دغه کمپاین د میدان وردګو ولایت د کرنې، اوبولګولو او مالدارۍ ریاست اړوند د څارویو ساتنې او روغتیا آمریت له لوري د عامې روغتیا ریاست په همغږۍ ترسره شو، چې مشري یې د څارویو ساتنې او روغتیا آمر ډاکټر محمدالله شهیدزي، د څارویو د روغتیا لوی مدیر ډاکټر نورالله نوري او د چرګانو، کبانو او ګټورو حشراتو روزنې مدیر ډاکټر عادل شاه کوله.
د یاد کمپاین پر مهال مسلکي ټیمونو د کانګو ناروغۍ د رامنځته کېدو لاملونو، د انتقال لارو، د مخنیوي تدابیرو او روغتیايي احتیاطي اصولو په اړه ګډونوالو ته مفصل معلومات ورکړل. همدارنګه د عامه پوهاوي او لارښوونې سلګونه معلوماتي پاڼې هم پر خلکو ووېشل شوې.
چارواکو د قربانۍ پر مهال د حفظ الصحې مراعتول د ناروغۍ د مخنیوي لپاره مهم وبلل او ټینګار یې وکړ چې خلک باید د څارویو د حلالولو او انتقال پر مهال له محافظتي وسایلو لکه دستکشو، ماسکونو او ځانګړو جامو څخه استفاده وکړي، ترڅو انسانانو ته د ناروغۍ د انتقال مخه ونیول شي.
د میدان وردګو د کرنې ریاست همدارنګه له ټولو هېوادوالو وغوښتل، چې د لوی اختر په ورځو کې روغتیايي اصول په جدي ډول مراعت کړي او د کانګو ناروغۍ د مخنیوي په برخه کې له اړوندو ادارو سره همکاري وکړي.
د یادونې وړ ده، چې کانګو ناروغي یوه خطرناکه ساري ناروغي ده، چې ډېری وخت د کنو (چیچړو) او یا هم د اخته څارویو د وینې او غوښې سره د مستقیم تماس له لارې انسانانو ته انتقالېږي، او د عامه پوهاوي کمپاینونه یې د مخنیوي لپاره اغېزمن رول لري.