فراه کې د لومړي ځل لپاره د عنابو او شاتو دوه ورځنی نندارتون په لاره واچول شو 

۴  وږی ۱۴۰۴ هـ.ش
۲ رَبِیعُ الْأَوَّل ۱۴۴۷ هـ.ق
د فراه د کرنې، اوبولګولو او مالدارۍ ریاست په هلو ځلو د (ډي.آر.سي) مؤسسې له خوا په دې ولایت کې د عنابو او شاتو دوه ورځنی نندارتون په لاره واچول شو.
په دې دوه ورځنی نندارتون کې ډول ډول شات او عناب نندارې ته وړاندې شوي و.
د دغه نندارتون د پرانیستې پر مهال د فراه مرستيال والي مولوي رحیم الله محمود وويل؛ چې حکومت د فرمانونو د پلي کېدو او مالياتو د راټولولو په برخه کې د ملي سوداګرو، بزګرانو او نورو صنعت کارانو همکاريو ته اړتيا لري، په وينا يې: د مالياتو له لارې لاسته راوړې پيسې د ولسي وګړو ستونزو ته د رسيدنې په موخه پر پراختيايې پروژو، د لويو لارو، کارخونو پر جوړولو او برېښنا باندې لګېږي.
نوموړي همدارنګه د دغه نندارتون له جوړونکو څخه د مننې ترڅنګ اړتيا ته په کتو سره د نورو ورته نندارتونونو د جوړولو هيله هم څرګنده کړه.
په ورته وخت کې د فراه د اقتصاد رياست رییس مولوي جمال الدين جلالي بيا د فراهي بزګرانو او د شاتو د مچيو د ساتونکو د لاسته راوړنو د ستاينې ترڅنګ ډاډ ورکړ، چې شته ستونزې به يې له اړوندو ادارو، همکارو مؤسسو او بنسټونو سره شريکې کړي.
ښاغلي جلالي همدارنګه زياته کړه، چې د فراهي بزګرانو او د شاتو د مچيو د ساتونکو لپاره د(ډي.آر.سي) مؤسسې له لوري ترسره شوې کړنې بسنه نه کوي او په دې برخه کې بايد نورې هڅې هم ګړندۍ شي.
په ورته وخت کې د فراه د اطلاعاتو او فرهنګ رییس محمد عبدالحي سباوون بيا په هېواد کې د پانګوالو پانګونه هر اړخيز پرمختګ وبلل، نوموړي د پانګونې د غوښتنې ترڅنګ ټينګار وکړ، چې اوس په هېواد کې د عنابو او شاتو سوداګرۍ ته د پراختيا وخت را رسیدلی دی او سوداګر بايد هڅه وکړي، چې له سوداګريزو هېوادونو سره دغه سوداګرۍ لا نوره هم پياوړې کړې.
فراه کې د (ډي.آر.سي) مؤسسې استازي انجينر محمد فهيم صالح وويل؛ چې د عنابو او شاتو دغه دوه ورځنی نندارتون يې د نارینه او ښځینه په جلا جلا څانګو کې له بزګرانو او د شاتو د مچيو له ساتونکو څخه د ملاتړ په موخه په لاره اچولی دی.
بل خوا په نندارتون کې د عنابو ګډونوالو بڼوالو او د شاتو د مچيو ساتونکو بيا له دغه نندارتون څخه د خوښې ترڅنګ وويل؛ که يې د عنابو او شاتو په برخو کې د اوبو، پروسس، وړ ځای، روزنې او نورې ستونزې هوارې شي، نو دغه سوداګرۍ به نړۍواله او ګڼو کسانو ته به د کار زمينه هم برابره کړي.
بايد وويل شي، چې په فراه کې د عنابو او شاتو دغه لومړنی نندارتون دی، چې د بزګرانو او مچيو د ساتونکو د ملاتړ په موخه د کرني ریاست په هلو ځلو د (ډي.آر.سي)  مؤسسې له لوري په لاره اچول کېږي.