د کندهار په ۱۶ ولسوالیو او ښار کې له ۶۱۰ زره څخه ډېر کوچني څاروي د پرازیټونو پر ضد درمل شول

د کندهار د کرنې، اوبو لګولو او مالدارۍ ریاست، د کوچنیو څارویو د روغتیا د خوندي کولو او د مالدارۍ د ودې په موخه، د کندهار ښار او ۱۶ ولسوالیو کې د داخلي او خارجي پرازیټونو د مخنیوي پراخ کمپاین بشپړ کړ، چې په ترڅ کې یې ۶۱۰ زره او ۸۰۰ کوچني څاروي درمل شول.
دغه کمپاین د دوو میاشتو په موده کې د کندهار ښار ترڅنګ په غورک، لوړ میوند، کښته میوند، لوړ شاولیکوټ، کښته شاولیکوټ، خاکریز، سپین بولدک، دامان، ډنډ، ژړۍ، پنجوایي، ارغنداب، معروف، ریګستان، ارغستان او ښورابک ولسوالیو کې ترسره شو، چې په هره ولسوالی کې د ټاکل شوې شمېرې له مخې کوچني څاروي د داخلي او خارجي پرازیټونو پر ضد درمل شول.
د کندهار د کرنې ریاست د مالدارۍ آمریت مسؤلین وایي، د دې کمپاین اساسي موخه په څارویو کې د داخلي او خارجي پرازیټونو له امله د رامنځته کېدونکو ناروغیو مخنیوی، د څارویو د روغتیا د ساتنې لپاره د وقایوي تدابیرو پلي کول، د تولیداتو لوړول او د مالدارانو اقتصادي ملاتړ دی.
د یادونې وړ ده، چې څو ورځې وړاندې هم د کندهار د کرنې، اوبو لګولو او مالدارۍ ریاست د کانګو ناروغۍ د مخنیوي په موخه د کندهار ښار او اتو ولسوالیو کې ۴۵۰۰ مالدارۍ فارمونه درمل‌پاشي کړل او نږدې ۱۰۰ زره لوی او کوچني څاروي یې د کانګو ناروغۍ پر وړاندې واکسین کړل، ترڅو د څارویو د ناروغیو د خپرېدو مخه ونیول شي او پر وخت وقایوي تدابیر عملي شي.