د غزني د کرنې رییس د قویه لرونکو ټولنې رییس او همکارو مؤسسو چارواکو سره مشورتي غونډه ترسره کړه
۷ کب ۱۴۰۴ه.ش
۹ رَمَضانُ المُبارَک ۱۴۴۷ه.ق
دغزنی ولایت دکرنې، ابو لګولو او مالداری رییس مولوی محمد اسماعیل شکیب د قویه لرونکو ټولنې رییس او همکارو مؤسسو چارواکو د ۱۴۰۵ کال د پسرلني نیالګیو کېنولو کمپاین په تړاو مشورتي غونډه ترسره کړه.
په دې غونډه کې د نیالګیو کېنولو د پروګرام د لا ښه تطبیق، د مېوه لرونکو او غیر مېوه لرونکو نیالګیو د ډولونو د ټاکلو، د اړوندو ادارو او همکارو مؤسسو ترمنځ د همغږۍ د پیاوړتیا، او همدارنګه د معیاري نیالګیو د برابرولو او بزګرانو ته د عادلانه وېش په اړه هر اړخیز بحث او د نظر تبادله وشوه.
ګډونوالو د بڼوالۍ پر پراختیا، د چاپېریال ساتنې، د زرغونتیا پر زیاتوالي او د بزګرانو د اقتصادي وضعیت په ښه والي کې د هغې پر ارزښت ټینګار وکړ.
همدارنګه پرېکړه وشوه، چې د یاد کمپاین د اغېزمن تطبیق په موخه به یو منظم کاري پلان جوړ شي او مسئولیتونه به په څرګنده توګه د اړخونو ترمنځ ووېشل شي، تر څو د ۱۴۰۵ کال د پسرلني نیالګیو کېنولو کمپاین په منظم او بریالي ډول عملي شي.
ټاکل شوې، چې د غزني په ولایت کې به ډېر ژر د نیالګیو کېنولو پسرلني کمپاین پیل شي.
