خوست کې پر ۴۰ هکټاره ځمکه ګني کرل شوي؛ سږکال د ۳۵۰ ټنه حاصلات اټکل کېږي

۵ لیندۍ ۱۴۰۴ هـ.ش
۵ جُمَادَى الثانی ۱۴۴۷ هـ.ق
د خوست د کرنې، اوبو لګولو او مالدارۍ ریاست چارواکي وايي، چې سږ کال په دغه ولایت کې پر شاوخوا ۴۰ هکټاره کرنیزه ځمکه ګني کرل شوي او نږدې ۳۵۰ ټنه حاصلات به ورڅخه تر لاسه شي.
د خوست دکرنې ریاست د معلوماتو له مخې، د کرنې ریاست مشرتابه هڅه کوي چې د کروندګرو ستونزو ته رسېدنه وکړي او د هغوی د تولیدي ظرفیت د لوړولو لپاره اړینې اسانتیاوې برابرې کړي. چارواکي زیاتوي چې د ګنیو د پروسس لپاره ځانګړو مرکزونو او کارخانو د جوړولو هڅې هم روانې دي، څو د بزګرانو تولیدات په معیاري ډول پروسس او بسته‌بندي شي.
د دوی په وینا، د پروسس د دغو مرکزونو په فعالېدو سره به نه یوازې د کروندګرو د تولید کچه لوړه شي، بلکې د کورنیو محصولاتو د بازارموندنې لپاره به هم نوي او پراخ فرصتونه رامنځته شي.