د کرنې وزارت سرپرست: د کرنې وزارت د بڼوالۍ او مالدارۍ ملي پروژې د تمویل د غځولو په موخه نړیوال بانک ته د واړندیز په پار بشپړ دلایل او طرحې چمتو شي
۸ تله ۱۳۹۹
د کرنې وزارت د بڼوالۍ او مالدارۍ ملي پروژې مشر ډاکټر عثمان صافی او ددې پروژې کارکوونکي د کرنې، اوبولګولو او مالدارۍ وزارت سرپرست او نوماند وزیر ډاکټر انوارالحق احدي سره د یوې غونډې په ترڅ کې ددې پروژې د فعالیتونو، لاسته راوړنو، تر چتر لاندې سیمو او د پروژې د بودیجې په هکله مالومات وړاندې کړل.
د کرنې وزارت د بڼوالۍ او مالدارۍ ملي پروژه په ۲۰۱۳ ام زېږدیز کال کې خپل کار پیل کړ او ټاکل شوې، چې د ۲۰۲۰ام کال تر پایه، پای ته ورسیږي.
دغه پروژه د هېواد په ۳۴ ولایتونو کې د بڼوالۍ او مالدارۍ په برخه کې ارزښتناکې پروژې پلي کول او مالدارانو او بڼوالو سره فني او روزنیزې همکارۍ کوي.
بڼوال او مالداران تل ددې پروژې له چوپړونو خوښ او راضي دي.
د بڼوالۍ او مالدارۍ ملي پروژې د مشر ډاکټر عثمان صافی له خوا د یادې پروژې په هکله د مالوماتو له وړاندې کولو وروسته، د کرنې، اوبولګولو او مالدارۍ وزارت سرپرست او نوماند وزیز ډاکټر انوارالحق احدي، ددې پروژې چارواکو ته سپارښتنه وکړه، تر څو د نړیوال بانک له خوا ددې پروژې د تمویل د غځولو په پار خپلې طرحې او دلیلونه چمتو کړي، چې هغوی ته وړاندې شي.
ښاغلی احدي وويل، چې د پروژې په هکله باید د نړیوال بانک اندېښنې بررسي او له منځه ولاړ شي.
