د هلمند دکرنې ریاست: ٢٦٧ قلمه داغمه او مازادو توکو د لیلام چارې پیل شوې 

د هلمند ولایت د کرنې، اوبولګولو او مالدارۍ ریاست اړوند ٢٦٧ قلمه داغمه او مازاد توکي چې پکې بېلابېل تر وخت تېر او زاړه اجناس او وسایل، چې د کرنې ریاست ورته اړتیا نلري شامل دي، د ازادې داوطلبۍ له لارې پلورل کېږي.
دغه توکي چې د وخت په تیرېدو سره په بشپړ ډول له کار او فعالیت څخه لویدلي و، د یوه ځانګړي پلاوی لخوا تشخیص او د لیلام وړ بلل شوي وو.
د نوموړو توکو د لیلامولو  چارې د ا.ا.ا د ریاست الوزراء عالي مقام په حکم د کرنې ، اوبولګولو او مالدارۍ وزارت او مالیې وزارت سره په همغږۍ په داسې حال کې پیل شوې، چې د مرکز څخه د راغلي پلاوي په ملتیا د ولایت مقام، استخباراتو ریاست، کرنې ریاست  او د بېلابېلو ادارو استازو هم حضور درلود.
نوموړي زاړه او تر وخت تېر وسایل، توکي او اجناس چې مخکې یې په اړه د راډیو او هلمند جریدې له لارې اعلانونه خپاره شوي وو اشخاصو، افرادو او مؤسساتو ته پکې بلنه ورکول شوې وه ترڅو د اړتیا وړ توکو رانیولو په موخه پروسه کې ګډون وکړي.