هلمند کې د ممپلیو کښت د ډېرېدو په حال کې دی

۷ مرغومي ۱۳۹۹
 د هلمند ولایت د کرنې، اوبو لګولو او مالدارۍ ریاست چارواکي وایي، چې په یاد ولایت کې د ممپلیو کروندې ډېرې شوي چې ورځ تر بلې یې کښت ته د هلمندي کروندګرو لوالیتا زیاتیږي.
د هلمند د کرنې رییس زلمی الکو د هلمند خاوره اوبه او هوا د ممپلیو کرکېلي، پالنې او روزنې ته مناسبه ګڼي او وایي، چې په همدې موخه ددې ولایت په مرکز لښکرګاه، نادعلي او یوشمېر نورو ولسوالیو کې د ممپلیو کرکېله هم زیاته شوې ده.
د ښاغلي زلمي الکو په وینا ددې ولایت په پنځه زره او  ۷۲۷هکټاره ځمکه ممپلۍ کرل شوي، چې سږ  به یې حاصلات شاوخوا ۲۵ زره او ۱۲۸ مټریک ټنو ته ورسیږي.
ممپلي، چې د کورني بازارنو تر څنګ په نړیواله کچه هم ښه بازار او مناسبه بیه لري په دې وروستیو کلونو کې په دې ولایت کې یې کرکېله مخ پر ډېرېدو ده.
د ممپلیو ارزښت ته په کتو د هلمند د کرنې ریاست په پام کې لري، چې په دې ولایت کې د ممپلیو کرکېله لا دود کړي، چې له یوې خوا د کوکنارو ښه بدیل ګڼل کیږي او له بلې خوا به د بزګرانو په اقتصادي وده کې هم رغنده رول ولري.