د کرنیزو محصولاتو مدیریت د پروژې د ګټې اخیستنې پیل

mail-admin
دوشنبه ۱۳۹۹/۶/۳ - ۱۶:۶
د کرنیزو محصولاتو مدیریت د پروژې د ګټې اخیستنې پیل: کابل کې د پیازو ۹۷ زېرمتونونه ګټې اخیستنې ته وسپارل شول

د کرنیزو محصولاتو مدیریت د پروژې د ګټې اخیستنې پیل:
کابل کې د پیازو ۹۷ زېرمتونونه ګټې اخیستنې ته وسپارل شول

۳ وږی ۱۳۹۹
د کرنې، اوبولګولو او مالدارۍ وزارت د کابل په ولایت کې د پیازو ۹۷ زېرمتونونه ګټې اخیستنې ته وسپارل.
د دغو زېرمتونونو د جوړولو چارې نږدې دوه میاشتې وړاندې د کرونا په پېر کې د کرنیزو محصولاتو مدیریت د برنامې له لارې د کابل ولایت د چهارآسیاب، موسهي، خاک جبار، بګرامی او ده سبز ولسوالیو کې پیل شوې و. د پیازو دغه زېرمتونونه هر یوه یې ۱۲ مټریک ټنه وړتیا لري او د پیازو یاد ۹۷ زېرمتونونه د ۴۷ میلیونه او ۷۵۶ زره او ۷۸۶ افغانیو په لګښت جوړې شوي دي.
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت‌الله غفوري نن د کابل د «فتوح کلا» په سیمه کې د پیازو د دوو زېرمتونو ګټې اخیستنې ته د سپارولو په غونډه کې وویل، دمګړۍ د هېواد په ۳۴ ولایتونو کې د نږدې ۱۱ زره کرنیزو پروژو چارې روانې دي، چې له دې ډلې د یوشمېر هغو رغنیزې چارې بشپړ شوي دي او پاتې نورې پروژې به یې هم ډېر ژر بشپړ او ګټې اخیستنې ته به وسپارل شي.
ښاغلی غفوري زیاته کړه، چې په هېواد کې د کرنیزو محصولاتو مدیریت د برنامې له لارې د نویو پروژو په لاره اچولو سره یو شمېر کسان په دې اند و، چې ددغو پروژو ودانیزې چارې، چې په کې د پیازو او کچالو زېرمتونونه، ممیزخونې او د مېوو لپاره صفر انرژۍ سړې خونې جوړول او د مېوو او سبو لپاره لمریز وچوونکي دستګاوې وېشل شامل و پر خپل وقت او د بڼوالۍ او کرنیزو محصولاتو د حاصل ټولولو څخه مخکې نه بشپړیږي، خو دغه پروژې ښه پرمختګ لري. هغه وویل: «نن یوازې د کابل په ولایت کې د پیازو ۹۷ زېرمتونونه بشپړ شوي او ګټې اخیستنې ته سپارل کیږي.» حشمت‌الله غفوري زیاته کړه: «د ولسمشر په سپارښتنې سره د هېواد په ۳۴ ولایتونو کې د ۱۱ زره پروژو رغنیزې چارې د حکومت له بودیجې څخه روانې دي. ددغو پروژو له ډلې د یوشمېر هغو چارې له ۲۰ تر ۴۰ سلنه بشپړ شوي یو شمېر یې د بشپړېدو په درشل کې دي او یوشمېر یې بشپړ شوي دي. د ۱۱ زره پروژو سربېره د کرنې وزارت د بڼوالۍ ځنځیري ارزښت د پراختیا سکټور د پروژې «HVCDP» له لارې په ټول هېواد او په ځانګړې توګه په اوو ولایتونو کې د نږدې یو زر او ۱۰۰ نورو پروژو چارې په چټکۍ سره روانې دي، چې یوشمېر یې بشپړ شوي هم دي.»
په ورته وخت کې، دکرنې وزارت د اوبولګولو او طبیعي سرچینو مرستیال زیاته کړه، چې په دوو راتلونکو میاشتو کې د څه باندې ۱۲ زره پروژو چې په کې د پیازو او کچالو زېرمتونه، ممیزخونوې او سړې خونې جوړول شامل دي بشپړ او ګتې اخیستنې ته به وسپارل شي.
په همدې حال کې د فتوح کلا د سیمې اوسیدونکي د نویو کرنیزو پروژو له پلي کېدو او په ځانګړې توګه په دې سیمه کې د پیازو د شپږو زېرمتونو له جوړېدو خوښ دي، خو وایي ددې سیمې بزګران د کرنې له وزارته غواړي، چې د کرنیزو اوبو، اصلاح شوي تخمونو، عصري کرنیزو توکو د چمتو کولو او د کرنیزو پورو د ورکړې په برخه کې دې هم ددې سیمې له بزګرانو او بڼوالو سره مرستې او همکارۍ وکړي.
دغه راز په فتوح کلا کې د پیازو د یو زېرمتون خاوند محمدداوود، په دې سیمه کې د کرنې وزارت له خوا د پیازو د زېرمتونونو د جوړولو په پار مننه وکړه او وویل، چې په تېرو کلونو کې یې د خپلو محصولاتو لویه برخه ویالې ته اچول. هغه وویل، چې تر دې مخکې د پیازو ساتل او په مناسب وقت خرڅولو ته یې زمینه نه وه برابر او ډېری محصولات یې خوڅا کېدل او اوبو ته به یې اچول. محمدداوود چې سږکال یې یونیم جریبه پیاز کرلي وویل: «مخکې مې د خپلو پیازو له محصولاتو دومره هېله نه وه، ځکه چې په ټیټه بیه پلورل کېدل او یا خوڅا کېدل. خو، سږکال چې د پیازو زېرمه تون راته جوړه شوې ده، هیله لرم، چې له خپل محصول څخه ډېره ګټه تر لاسه کړم.»
عید محمد بل بزګر دی، چې دکرنې وزارت له خوا ورته د پیازو زېرمه تون جوړه شوې ده. هغه وایي: «په تېرو کلونو کې مو چې پیاز کرل په مناسبه بیه نه خرڅېدل او که موساتل نو خوڅاکېدل. خو سږکال چې د پیازو زېرمه تون راته جوړه شوې ده، کولای شم چې خپل محصول زېرمه او په مناسبه بیه یې خرڅ کړم. تر دې وړاندې اړکېډو چې د خپلو محصولاتو یوه برخه سیند ته واچوو.»
کاري فرصتونه برابرول ددغو پروژو نورې مهمې موخې دي. یوازې د پیازو د ۹۷ زېرمتونونو په جوړولو سره چې ګټې اخیستنې ته سپارل شوي دي، د جوړولو په لړ کې یې ۵۸۲ کسانو ته د کار زمینه برابره شوې وه. د هر یوه زېرمتونه په جوړېدو سره درې نورو کسانو ته د تل پاتې دندې زمینه هم برابره شوې ده.

تازه ترین اخبار

شنبه ۱۴۰۵/۸/۳۰ - ۱۶:۱۳
Background image

ننګرهار کې ۱۰۰ تنو د ستروسو او سبو پروسس کوونکو ته د ۲.۶ میلیونه افغانیو په ارزښت وسایل ووېشل شول

۳۰ لړم ۱۴۰۵ هـ.ش
۱۰ جُمَادَى الثانی ۱۴۴۸ هـ.ق
د ننګرهار ولایت د کرنې، اوبو لګولو او مالدارۍ ریاست په هڅو، د «ډاکار» مؤسسې په تخنیکي همکارۍ او د ملګرو ملتونو د نشه‌یي توکو او جرمونو سره. . .

چهارشنبه ۱۴۰۵/۸/۶ - ۱۱:۵
Background image

نورستان کې سلګونو اړمنو بزګرانو ته د اصلاح شویو تخمونو او کیمیاوي سرو د وېش لړۍ پیل شوه

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د نورستان ولایت د کرنې، اوبو لګولو او مالدارۍ ریاست په همغږۍ، د خوړو او کرنې نړۍوالې ادارې «اف‌اې‌او» په مالي ملاتړ او د «اې‌وای‌اس‌او» مؤسسې. . .

چهارشنبه ۱۴۰۵/۸/۶ - ۹:۳۰
Background image

ننګرهار کې د غنمو ننداریزو کروندو لپاره اصلاح شوي تخمونه او کیمیاوي سرې ووېشل شوې

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په تخنیکي همکارۍ او د کرنې وزارت په مالي ملاتړ، د دغه ولایت په اوو ولسوالیو کې د غنمو ننداریزو. . .

بازگشت