د ننګرهار وادي کرنیز امارتي شرکت په فارمونو کې د غنمو پراخ کښت؛ ولاړ کښت په ښه حالت کې دی
۲۵ کب ۱۴۰۴ه.ش
۲۷ رَمَضانُ المُبارَک ۱۴۴۷ه.ق
د ننګرهار وادي کرنیز امارتي شرکت د مطبوعاتو له مخې، د یاد شرکت په څلورګونو فارمونو کې پر پراخو او حاصلخېزو ځمکو د غنمو پراخ کښت ترسره شوی دی، چې دا چاره د کرنې د ودې او د خوړو د خوندیتوب لپاره مهم ګام بلل کېږي.
د معلوماتو له مخې، دغه غنم د ننګرهار وادي کرنیز امارتي شرکت د امارتي کښت تر چتر لاندې، سربېره پر دې د قراردادي کرنیزو شرکتونو او اجارهلرونکو بزګرانو له خوا هم کرل شوي دي.
د کرنیزو مسؤلینو په وینا، له نېکه مرغه د غنمو ولاړ کښت دا مهال په ښه وده او مناسب حالت کې قرار لري. د کرنیزو اصولو له مخې ورته پر وخت اوبه ورکول کېږي او ټول اړین اګروتخنیکي فعالیتونه لکه سرې کارول، واښه پاکول او نور اړین تدابیر پر وخت ترسره کېږي، ترڅو د ښه او باکیفیته حاصل ترلاسه کېدو زمینه برابره شي.
د چارواکو په خبره، د دغو کښتونو موخه نه یوازې د کرنیز تولید زیاتوالی دی، بلکې د هېواد د کرنې سکتور پیاوړتیا او د خوړو خوندیتوب ته هم ځانګړې پاملرنه کېږي.
همدارنګه د دغو کرنیزو فعالیتونو له برکته ګڼ شمېر هېوادوالو ته د کار او روزګار زمینه هم برابره شوې ده، چې د خلکو د اقتصادي وضعیت په ښه والي کې مهم رول لري.
