کورنیو کرنیزو محصولاتو پېر-پلور ته دهېوادوالو لېوالتیا

دهقان (بزګر) اوونیزه / نورالله پتمن
افغانستان د نړۍ د هغو هېوادونو په ډله کې شمېرل کېږي، چې ډېری وګړي یې د کرنې او مالدارۍ له لارې خپل ورځني اړتیاوې پوره کوي، چې له همدې امله یې ډېری کرنیز محصولات د سیمې په کچه یو له خورا ارزښتمنو توکو څخه شمېرل کیږي.
دا چې په افغانستان کې کرنه د هېواد د اقتصادي پیاوړتیا جوړولو لپاره ترټولو غوره او شاید یوازینۍ لار وي تر څو له دې لارې وکولای شو د سیمې په کچه د اقتصادي او کرنیز سیال په توګه خپل ارزښت وساتو او لا پرمختګ ته د کرنیز هېواد په توګه زمینه برابره کړو.
کرنیزو محصولات او په تېره بیا د هېواد له ګوډ ګوډ څخه د بزګرانو او بڼوالو په لاس راټولې شوې ډول ډول مېوې لکه انګور، شفتالو، زردلو، اولوچې او نور پخې شوې دي او د کابل د مېوو مارکېټ یې خورا د پېر او پلور په ګرم بازار بدل کړي دي، چې یاد مارکېټ ته هره ورځ په ګڼ شمېر موټرو کې هغه مېوې، چې د کروندګرو له ډېر زیارګللو وروسته پخوالي ته رسېدلي تر مارکېټه او وروسته له مارکېټه د ډېر پېر او پلور لپاره سیمه ییزو بازارونو ته وړل کېږي، چې یوه غوره بېلګې یې د پلازمینې کابل د مېوو ګرم بازار او لوی مارکېټ دی.
د هېواد پلازمېنه دا مهال د خپلو کرنیزو محصولاتو په بېلابېلو او رنګارنګ مېوو خپل د خوند او ښایست سیوری غوړاولی دی، چې د ګڼو خلکو او سوداګرو ورځنۍ ژوند یې ورسره بوخت ساتلی دی.
د کابل ښار د مېوو منډوي ته د تازه مېوو راوړنکي سوداګر او پلورنکي وایي، چې وطني کرنیزمحصولات د بهرنیو محصولاتو په پرتله د خوند او کیفیت له پلوه خورا ښه او د ډېر پېریدونکي لري.
حسیب خیري د کابل د تازه مېوو په مارکېټ کې هټی لري هغه وایي، د مېوو بازار نورو وختونو ته په کتو ځکه ښه ده، چې ډېری هېوادوال له کورنیو محصولاتو ګټه پورته کوي هغه وویل: «که څه هم اوسمهال خلک د کرونا وبا له وجې رنځ وړي خو بیا هم خلک ددې وبا سره د مبارزې په پار له وطني تازه مېوو څخه ګټه پورته کوي، ځکه دا مېوې ټول طبیعي او خوندور دي.»
د خیري په وینا د پېر او پلور په مارکېټ کې دا مهال د بهرنیو هېوادونو په ګډون د هېواد ګڼې مېووې لکه زردالو، الو، شفتالو، ګیلاس، الوبالو، هندواڼې، خټکي او نورې شتون لري، چې د بهرنیو هېوادونو مېوو ته په کتو یې هم کیفیت ښه او پېر او پلور یې ډېر دی.
 نموړی له حکومته غواړي، چې د مېوو د ساتلو او بسته بندۍ په برخه کې له دوی سره همکاري وکړي.
دا مهال د هېواد په ډېریو ولایتونو کې په ګڼ شمېر مېوې پخوالي ته رسېدلي، چې له پخوالي سره سم یې سوداګر د کابل مېوو مارکېټونو ته راوړي دي.
احمد ذاکر امیري د کابل د تازه مېوو په مارکېټ کې د هندواڼې او خټکیو په پېر-پلور بوخت دی، نموړی وایي، چې وطني خټکي او هندواڼې خورا لوړ کیفیت لري او نورو وختونو ته په کتو یې بازار او بیې یو څه ښه دي.
هغه د تازه مېوو د پېر-پلور په برخه کې لوی خنډ د سړوخونو نشتون یادوي او په دې برخه کې له حکومت څخه د لا ډېرو همکاریو غوښتنه کوي.
د هېواد په ډېرو ولایتونو کې یو شمېر کرنیز محصولات پخوالي ته رسېدلي او پاتې نور یې د پخېدو خواته راون دي، چې هر کال د کرنې وزارت یې د پراختیا  او  مدیریت په پار ګڼ شمېر پرګرامونه، اغېزمنې برنامې او یو شمېر پروژې پلي کړي دي. د هېواد مېوې د یو شمېر نورو ولایتونو سر بېره بهرنیو هېوادونو ته هم صادرېږي، چې د پېر او پلور لپاره یې د سیمې په کچه ښه نوم او بازار هم خپل کړی دی.