کندز کې د ملکیت د تثبیت واحد مرکز د پرانیستې په موخه د کرنې وزارت د پلاوي سفر

۱۰ غویی ۱۴۰۵ه‍.ش
۱۳ ذُو ٱلْقَعْدَةِ ۱۴۴۷ه‍.ق
د زونونو په کچه د ملکیت د تثبیت واحد مرکز د پرانیستې په موخه، د کرنې، اوبو لګولو او مالدارۍ وزارت د اراضۍ ریاست لوړپوړي پلاوي کندز ولایت ته سفر وکړ او په همدې تړاو یوه مهمه غونډه د یاد ولایت د کرنې ریاست کې ترسره شوه.
په دې غونډه کې دکرنې وزارت د اراضۍ ریاست رییس مولوي محمود مظلوم، د کندز ولایت د کرنې رییس مولوي نیاز محمد عابد، د محاکمو، مستوفیت او ښاروالۍ رییسانو تر څنګ د اراضۍ ریاست تخنیکي او حقوقي سلاکارانو، آمرینو، د تثبیت څانګې کارمندانو او د کندز ولایت ګڼو کارکوونکو ګډون کړی و.
د غونډې په پیل کې، د کندز د کرنې رییس مرکز څخه راغلي پلاوي ته ښه راغلاست ووایه او د ملکیت د تثبیت واحد مرکز پرانیستل یې په یاد ولایت کې یو مهم او اغېزناک ګام وباله. نوموړي د دې نوښت ستاینه وکړه او ډاډ یې ورکړ، چې په دې برخه کې به هر ډول لازمې همکارۍ ترسره کړي.
وروسته د کرنې وزارت د اراضۍ رییس مولوي محمود مظلوم د ګډونوالو څخه د مننې ترڅنګ د یاد مرکز پر ارزښت خبرې وکړې. هغه وویل، چې د ملکیت د تثبیت واحد مرکز پرانیستل د اسلامي امارت د مشرتابه د حکم پر بنسټ ترسره کېږي او ټاکل شوې ده، چې دا مرکزونه د هېواد په ټولو زونونو کې فعال شي. د نوموړي په وینا، د همدې موخې لپاره شمالي ولایتونو ته د پلاوي سفر پیل شوی دی.
هغه زیاته کړه، چې د دې مرکزونو فعالېدل به په ځانګړې توګه د کندز ولایت د اوسېدونکو ستونزې د کور جوړونې په برخه کې حل کړي او خلکو ته به دا زمینه برابره شي، چې د قانون او اصولو مطابق په اسانه توګه خپل سرپناه جوړه کړي.
مولوي مظلوم له ټولو مسؤلینو او کارکوونکو وغوښتل، چې خپلې دندې په پوره اخلاص، صداقت او ژمنتیا سره ترسره کړي، له مراجعينو سره نېک چلند وکړي او د خلکو ستونزو ته پر وخت رسېدنه وکړي.
د غونډې په پای کې، له مرکز څخه تللي پلاوي د تثبیت څانګې کارکوونکو ته په عملي او ګروپي ډول لازمې تخنیکي لارښوونې وکړې، څو هغوی وکولای شي په راتلونکي کې خپلې دندې په اغېزمنه او معیاري توګه پر مخ یوسي او له هر ډول خنډ او ځنډ څخه مخنیوی وشي.