کجکي ولسوالی ته د هلمند دکرنې رییس سفر
۱۷ وری ۱۴۰۲ه.ش
۱۵ رَمَضانُ المُبارَک ۱۴۴۴ ه.ق
د هلمند ولایت د کرنې ، اوبولګولو او مالدارۍ رییس مولوي نظرمحمد صدیقي په مشرۍ یو پلاوی د کرنیزو چارو ارزولو او د ځمکوالو ستونزو اورېدلو په موخه کجکي ولسوالی ته سفر وکړ.
د یاد سفر پر مهال د هلمند د کرنې رییس سره مولوي محمد باران مبرور، مولوي زین الله زاهد او د ځمکو آمریت انجنیرانو هم ملتیا کوله.
د هلمند دکرنې رییس او ورسره مل پلاوي کجکي ولسوالی ته د رسېدو سره سم لومړی د ولسوالی مرستیال، استخباراتو مسؤل، امنیه قوماندان، ښاروال او د کرنیزو خدمتونو مدیر سره ناسته وکړه او له یادو مسؤلینو سره یې د خپل سفر موخه شریکه کړه.
ورپسې د هلمند دکرنې رییس د ولسوالی د مسؤلینو په ملتیا د تنګي له نوي جوړېدونکي بازار څخه او په سیمه کې یې د ګڼو ولسي خلکو سره هم لیدنه وکړه، د هغوی ستونزې، غوښتنې او سپارښتنې یې واورېدې او د حل په برخه کې یې د مرستې او همکارۍ ډاډ ورکړ.
د یادولو وړ ده، چې نوموړي پلاوی کجکي ولسوالی ته د کرنیزو چارو ارزولو او د ځمکوالو ستونزو اورېدلو په موخه یادې ولسوالی ته سفر کړی و.
