پکتيا کې د ځنګلونو خونديتوب په پار هلې ځلې
۱۷ وږی ۱۴۰۱ه.ش
۱۱صَفَرالمظفّر ۱۴۴۴ ه.ق
د پکتيا د کرنې، اوبولکولو او مالدارۍ رياست په دې ولايت کې د ځنګلونو د خونديتوب په پار هلې ځلې چټکې کړي دي.
په همدې موخه د پکتيا ولايت د کرنې، اوبولګولو او مالدارۍ رئیس الحاج مولوي عبدالروف سعيد د ځنګلونو د قطع مخنيوي او د بزګرانو او مالدارانو د ستونزو د اوريدو په موخه څمکنيو ولسوالۍ ته سفر وکړ.
ښاغلي سعيد د ياد سفر په ترڅ کې د څمکنيو ولسوالۍ له ولسوال، ملکي او نظامي چارواکو، قومي مشرانو، بزګرانو او مالدارانو سره په ليدنه کې د ځنګلونو د قطع په مخنيوي د ټينګار ترڅنګ په ياده ولسوالۍ کې د شنو لرګیو په تجارت د بندیز غوښتنه هم وکړه.
نوموړي د سيمې له خلکو وغوښتل چې ځنګلونو ته د تلپاتې شتمنۍ په سترګه وګوري او د ساتنې لپاره يې د کرنې له رياست سره بشپړ همکاري وکړي.
د سفر په ترڅ کې د عشر او زکات مسولينو ته سپارښتنه وشوه، چې د عشر او زکات د راټولولو لړۍ چټکه او د دولت خزانې ته تحويل کړي.
د سيمې خلکو د کرنې او مالدارۍ په برخه کې خپلې ستونزې د کرنې له رئیس سره شريکې او د ځنګلونو د قطع مخنيوي او ساتنې په برخه کې د خپلې همکارۍ ژمنه هم وکړه.
