په کابل کې د کرنیزو او مالدارۍ محصولاتو له نندارتون څخه د کډوالو او راستنېدونکو چارو وزارت د مرستیال لیدنه
۱۲ تله ۱۴۰۴ هـ.ش
۱۱ رَبِیعُ الْثاني ۱۴۴۷ هـ.ق
د کډوالو او راستنېدونکو چارو وزارت مسلکي مرستیال مولوي عبدالرحمن راشد، دکابل په بادام باغ کې د کرنې، اوبو لګولو او مالدارۍ وزارت د کرنیزو او مالدارۍ محصولاتو له نندارتون څخه لیدنه وکړه.
په دې لیدنه کې دکرنې وزارت د کرنې او مالدارۍ مرستیال مولوي صدراعظم عثماني او د کرنې وزارت یو شمېر رییسان هم حضور درلود.
د کرنې، اوبو لګولو او مالدارۍ وزارت د هېواد د کرنیزو او مالدارۍ محصولاتو د معرفي او بازارموندنې په موخه د کرنې او مالدارۍ درې دېرشم نندارتون د کابل په بادام باغ کې د روان کال د تلې له نهمې تر دولسمې نېټې د څلورو ورځو لپاره دایره کړې ده، چې د کورنیو محصولاتو د سوداګرۍ د ودې او د بزګرانو د ملاتړ لپاره یو مناسب فرصت رامنځ ته شوی دی.
د کرنې وزارت چارواکي وایي، چې د دې ډول پروګرامونو ترسره کول د تجربو د تبادلې، د بېلابېلو ادارو د همکارۍ د جلب او د کرنې او مالدارۍ په برخو کې د نوو کاري فرصتونو د رامنځته کولو زمینه برابروي.
