لندن کې «د افغانستان د کرنې په سکټور کې د پانګونې طلایي فرصتونه» پانګوالو ته ور وپېژندل شول
۲۳ تله ۱۳۹۸
د کرنې، اوبولګولو او مالدارۍ وزیر نصیر احمد درانی د افغانستان او بریټانیا ترمنځ د سوداګرۍ او پانګونې په دویم کنفرانس کې کډون وکړ.
په دې کنفرانس کې د کرنې وزیر د پانګونې د فرصتونو په بیانولو سره په دې برخه کې بریټانیایی سوداګر پانګونې ته ور وبلل. ښاغلی درانی د کرنې په برخه کې د پانګونې شته فرصتونه یو ښه فرصت وبلل او هغو کسانو سره چې په دې برخه کې پانګونې ته چمتو دي د هر ډول همکاریو ژمنه وکړه.
د کرنې وزیر دغه راز هغو سوداګرو ته چې بریټانیا ته د کرنیزو توکو د صادرولو په برخه کې کار کوی یادونه وکړه، چې په بریټانیا کې د طبیعي کرنیزو توکو یا «Organic»پېر ته لېوالتیا په زیاتېدو ده او د کرنې وزارت چمتو دی، چې بریټانیاته د افغانستان د کرنیزو محصولاتو د صادراتو په برخه د سټنډرډونو په چمتو کولو، د تصدیق پاڼو او جوازونو د صادرولو په برخه کې هر اړخیزې همکارۍ وکړي.
باید وویل شي، چې بریټانیا په اروپا کې د افغانستان دویم سوداګریز شریک دی، چې په بېلابېلو سوداګریزو برخو او بازار کې د پام وړ پوتانسیل لري.
