د کرنې وزیر د کرنیزو همکاریو د یوې سند د لاسلیک په پار ترکیې ته ورسېد
۱۸ کب ۱۳۹۹
د کرنې، اوبولګولو او مالدارۍ وزیر ډاکټر انوارالحق احدي د افغانستان اسلامي جمهوري دولت د یوې لوړپوړې پلاوې په مشرۍ، د ترکیې جمهوري دولت او د افغانستان اسلامي جمهوري دولت ترمنځ د کرنې په برخه کې د تخنیکي، علمي او اقتصادي همکاریو د زمینې برابرولو د یوې هوکړه لیک د لاسلیک په پار د ترکیې جمهوري دولت ته ورسېد.
له ښاغلي احدي سره په دې سفر کې د نورم او اسټنډر ملي ادارې رییس عزیز احمدزی، د زېربناوو او قراردادونو د حقوقي څانګې د انسجام رییس ولید اکبر سروري، د بهرنیو چارو وزارت استازی او د کرنې وزارت یوشمېر رییسان ملتیا کوي.
د ترکیې جمهوري دولت ته د کرنې وزیر په رسېدو سره، په انقره کې د افغانستان اسلامي جمهوریت سفیر امین رامین، د دوست هېواد ترکیې د پارلمان استازی او د ترکیې په پارلمان کې د اروپا د ګډ کمیسیون رییس اسماعیل امره قره یل، د ترکیې د کرنې او ځنګلوالۍ وزارت د بهرنیو اړیکو رییس او زده کړیالانو د کرنې، اوبولګولو او مالدارۍ وزیر ډاکټر انوارالحق احدي هرکلی وکړل.
ټاکل شوې، چې د افغانستان اسلامي جمهوري دولت او د ترکیې جمهوري دولت ترمنځ د کرنې په برخه کې د تخنیکي، علمي او اقتصادي همکاریو د زمینې برابرولو هوکړه لیک نن د افغانستان دکرنې، اوبولګولو او مالدارۍ وزیر او د ترکیې د کرنې او ځنګوالۍ وزیر ډاکټر بکر پاکډمیرلي ترمنځ د یاد هېواد دکرنې په وزارت کې لاسلیک شي.
