د کرنې وزیر د «پارسا» موسسې له مشرې سره وکتل

۲۸ کب ۱۳۹۹
د کرنې، اوبولګولو او مالدارۍ وزیر ډاکټر انوارالحق احدي دخپل کار په دفتر کې د «پارسا» موسسې مشرې لوریین هارټمن « Lorraine Hartman» سره وکتل.
په دې لیدنه کې د «پارسا» موسسې مشرې لوریین هارټمن د کرنې وزیر ته وویل، د «پارسا» موسسې په پام کې لري، چې د شنوخونو د جوړولو له لارې یوشمېر مېرمنو ته د سوداګریزو فعالیتونو زمینه برابره کړي. هغه دغه راز وویل، یاده موسسه په پام کې لري، چې د کرنیزو محصولاتو د بسته بندۍ په برخه کې د یوشمېر بزګرانو ملاتړ هم وکړي.
په همدې حال کې دکرنې، اوبولګولو او مالدارۍ وزیر ډاکټر انوارالحق احدي، دکرنې او سوداګرۍ په برخو کې مېرمنو ته د کاري زمینو برابرولو په پار د «پارسا» موسسې د پرېکړې هرکلی وکړ او ویې ویل، چې افغانستان غوره کرنیز محصولات لري، خو د دغو محصولاتو د بسته بندۍ، بازارموندې او ترڅنګ یې سوداګریزو اسانتیاو ته د مېرمنو د لاس رسي په برخه کې باید ډېر کار ووشي.
دکرنې وزیر وویل، چې د افغانستان کرنیز محصولات باید معیاري او ددې توان پیدا کړي، چې له بهره واردشویو محصولاتو سره سیالي وکړي.