۱ وږی ۱۳۹۹

د کرنې، اوبولګولو او مالدارۍ وزارت د کاپیسا په ولایت کې د کرنیزو محصولاتو مدیریت د پروژې له لارې ۱۷۷ نوي کرنیزې پروژې په لاره اچولي، چې ددغو پروژو د یوشمېر هغو چارې پر مخ تللي.

د کاپیسا د کرنې رییس همایون حبیب وایي: «کاپیسا کې ۱۷۷ کرنیزې پروژې پلي کیږي. په دغو پروژو کې ۱۹۹ ممیزخونې، د پیازو ۴۰ زېرمتونونه، د کچالو ۲۰ زېرمتونونه او د مېوو ۱۲ سړې خونې جوړول او ۵۰ لمریز دستګاوې وېشل شامل دي. دغه پروژې سیمې او اقلیم ته په کتو انتخاب شوي او چارې یې روانې دي.»

ښاغلی حبیب وویل، چې دغه پروژې د بزګرانو او بڼوالو د محصولاتو د خوساکېدو د مخنیوي په پار په لاره اچول شوي دي، چې له یوې خوا بازار مدیریت شي او بلخوا د بزګرانو عواید زیات شي.

په تېرو کلونو کې د بزګرانو محصولات په ټيټه بیه پلورل کېدل او یاهم د سړوخونو د نشتون له وجې خوساکېدل. خو د نویو پروژو په لاره اچول کولای شي، چې ددغې ستونزې مخه ونیسي.

دغه پروژې، چې د کاپسا ولایت د مرکز محمودراقي په ګډون ددې ولایت د لومړی حصه، دویم حصه، کوه بند، نجراب او تګاب په ولسوالیو کې پلي کیږي، ټولیز لګښت یې ۱۲۰ میلیونه افغانیو ته رسیږي.

په همدې حال کې د کاپیسا ولایت بڼوال او بزګران د دغو پروژو د پلي کېدو هرکلۍ کوي او وایي، چې ددغو پروژو په بشپړېدو سره به د دوی د عوایدو کچه څو چنده زیاته شي.

د کاپیسا د مرکز اړوند د احسان دکلي یو تن بزګر رازمحمد وایي: «نږدې یوه میاشت کیږي، چې د پیازو دزېرمتون د جوړولو چارې مې پیل کړئ دی، سږکال مې په درې جریبه ځمکه کې پیاز کرلي دي، د کاپیسا د کرنې ریاست د همدې پیازو د ساتنې په پار موږ ته د پیازو زېرمتون جوړوي، په تېرو کلونو کې مو د خپلو کروندو حاصلات ډېر ژر خرڅول، ځکه چې خوساکېدل، اوس چې د غه زېرمتون جوړیږي، خپل حاصل زېرمه کوو کله چې بیه یې لوړې شي بیایې خرڅوو. تېرکال مو د پیازو حاصل زر منه وه، چې هر من مو له ۵۰ افغانیو په ټیټه بیه خرڅ کړل. د بازار د نشتون له وجې یوه اندازه یې خوساشول، که سړه خونه وه، داسې نه کېده. انشاءالله سږکال یې هر من له ۱۰۰تر ۱۵۰ افغانیو خرڅوو.»

په هېواد کې نوي کرنیزې پروژې په لاره اچول، هېوادوالو لپاره ښه کاري فرصتونه هم برابر کړي دي.

سیدرحمان هغه کارکوونکی، چې د پیازو د یوې زېرمتونه په رغولو کې په کار بوخت دی وایي: «لس ورځې کیږي، چې په دې زېرمتون کې کارکوم، د ورځې ۳۵۰ افغانۍ اخلم، پنځه کسان په کې کارکوو، په پام کې لرم، چې له دې پیسې سره یوه اندازه نوره پیسې هم یوځای کړم او د مالدارۍ سوداګري پیل کړم.»