د سمنګان د پستې سږنۍ حاصلات نږدې ۶۹ ټنو ته رسېدلې ده
۳ وږی ۱۳۹۹
د سمنګان ولایت په څه باندې ۴۲ زره او ۵۰۰ هکټاره ځمکه کې د پستې بڼونه جوړ شوي دي. د پستې دغه کروندې، چې په طبیعي ډول او دکرنې وزارت له خوا اېښودل شوي د پستې ونې په کې شامل دي، سږنۍ حاصلات یې نږدې ۶۹ مټریک ټنو ته رسېدلې ده.
د سمنګان ولایت د کرنې رییس محمدرحمن ارغندیوال وایي: «د سمنګان په ولایت کې دوه ډوله پستې (للمي او اوبیزې) شتون لري، چې تر بادغیس وروسته سمنګان د هېواد په کچه د پستې دویم تولیدوونکی ولایت دی او زموږ سږنۍ حاصلات ۶۹ مټریک ټنه ده.»
هغه زیاته کړه: «موږ هلې ځلې کوو چې د پستې کروندې پراخې او د پستې ډېر بڼونه جوړ کړو، ستر پروګرام مو په پام کې نیولی، چې د خوړونو تنظیم او د پستې د کرکېلي سیمو ته پراختیا ورکول دي؛ موږ د پستې ۱۶۰ زره نیالګي تولیدوو، چې د پستې د بڼونو سیمو ته پراختیا ورکړو.»
ښاغلی ارغندیوال وویل، په تېرو کلونو کې د خلکو له خوا د پستې ونې پرې کېدل، خو اوس مهال د ځنګلونو او د پستې د ونو د پرېکېدو مخه نیول شوې ده او د پستې کروندې هم په پراخېدو دي، موږ د حاصلاتو د ښه کېدو په پار ۱۶ زره او ۵۰۰ نیالګي پیوند کړي دي، چې د پستې د تولیداتو د زیاتوالي لامل شوی دی.
د سمنګان ولایت د ایبک د پیګتاش د سیمې یوتن بڼوال حاجي نورآغا، چې دکرنې وزارت په همکارۍ ورته بڼ جوړ شوی دی، وایي: «د پستې شپږ زره او ۳۰۰ نیالګي مو ایښې دي، تر دې مخکې مو غنم کرل خو حاصل یې ښه نه وو، د کرنې وزارت له موږ سره همکار دی او زما د بڼ د جوړولو نیمایي چارې یې پرخ وړي دي، په دې تمه یو چې په راتلونکې کې دغه بڼ ښه حاصل ورکړي، ځکه چې اوس نوی جوړه شوې ده.»
باید وویل شي، چې د کرنې، اوبولګولو او مالدارۍ وزارت د سمنګان په ولایت کې د پستې پنځه زره او ۲۰۰ هکټاره کروندې جوړې کړي دي. دغه راز د پستې د سیمو د پراختیا او د حاصلاتو د زیاتوالي په خاطر د شوراګانو له لارې هر کال پر بڼوالو د پستې ډېر شمېر نیالګي هم وېشي.
