دکرنې سرپرست وزیر له خوا د درمل پلورنې او سوداګریز مرکز پرانیسته
۲۵ لړم ۱۴۰۱ه.ش
۲۱ ربیعالثاني ۱۴۴۴ ه.ق
دکرنې، اوبولګولو او مالدارۍ وزارت سرپرست وزیر مولوي عطاءالله عمري له خوا د کابل ۱۵ مه ناحیه پروان هوټل کې د کابل درمل پلورنې او سوداګریز شرکت افتتاح شو.
دکرنې وزارت وزیر مولوی عطاءالله عمري د درملو مارکېت پرانیست غونډه کې سوداګرو ته وویل:«الحمدالله په خپل هېواد کې ترټولو غوره خاوره، خوږې اوبه او مناسبه هوا لرو. هلې ځلې کوو، چې دکرنې په برخه کې لاډېر او غوره ګامونه وچت کړو، ترڅو زموږ ملي اقتصاد هم وده وکړي او د بهرنیو له بندیزونو خلاص شو.»
دکرنې وزیر زیاته کړه: « دکرنې په وزارت مسلکي او تخنیکي کسان کار کوي، ترڅو د کرنې او نورو برخو کې پرمختګ ولرو. که افغانستان هر ډول بندیزونه، کمۍ او ستونزې ولري، بیاهم د افغانستان، خاوره، اوبه او هوا زموږ په لاس کې دی، او د افغانستان کرنه هم له همدې درې شیانو لاسته راځي.»
د کابل د درملو پلورلو او سوداګریز مرکز د «سخي بشارت» شرکت له خوا جوړه شوې ده، چې ددې مرکز ځمکه د کابل ښآروالۍ له خوا د درې کالو لپاره په قرارداد او میاشتنۍ کرایه ورکړل شوی دی، چې تر درې کالو وروسته د کابل ښاروالۍ ته سپارل کېږي.
ددې مرکز په پرانیست غونډه کې دکرنې، اوبولګولو او مالدارۍ سرپرست وزیر، د کابل ښاروالۍ د خدماتو مرستیال، د یوشمېر بېلابېلو نهادونو رییسانو، د درملو د ټولنې چارواکو او یوشمېر سوداګر ګډون درلود.
