ارزګان کې د ۵۷ نویو کرنیزو پروژو چارې روانې دي
۵ وږی ۱۳۹۹
د ارزګان د کرنې، اوبولګولو او مالدارۍ رایست وایي، په دې ولایت کې د کرنیزو محصولاتو مدیریت د پروژې په اډانه کې، چې د ۵۷ نویو کرنیزو پروژو چارې پیل شوې وې، رغنیزې چارې یې ۱۵ سلنه بشپړ شوي دي، چې په پلي کېدو سره یې لسګونو کسانو ته د کار زمینه برابره شوې ده.
د ارزګان ولایت دکرنې رییس احمدشاه خیري وویل، چې دغه پروژې د ارزګان ولایت د مرکز ترینکوټ ترڅنګ ددې ولایت په ولسوالیو کې هم پلي کیږي.
ښاغلی خیري وویل: «ارزګان کې دکرنیزو محصولاتو مدیریت د پروژې په اډانه کې ۵۷ پروژې د پلي کېدو په حال کې دي، چې له دې ډلې د پیازو ۵۰ زېرمتونو نه، د کچالو پنځه زېرمتونونه او د مڼې لپاره دوه سارک سړې خونې دي، چې ددغو پروژو رغنیزې چارې ۱۵ سلنه بشپړ شوي او پاتې چارې به یې هم ډېر ژر بشپړ او ګټې اخیستنې ته به وسپارل شي.»
د ارزګان د کرنې رییس وویل: «ارزګان کې د کرنیزو محصولاتو مدیریت د پروژې پلي کېدل ددې ترڅنګ، چې د ارزګان د بزګرانو او بڼوالو کرنیز توکي خوندي ساتي، ددې ولایت د کروندګرو او بڼوالو ستونزې راکموي، د عوایدو کچه یې زیاتوي او ترڅنګ یې لسګونو کسانو ته د کار زمینه برابروي.»
په همدې حال کې د ارزګان ولایت هغه بزګران، چې دکرنې وزارت له خوا ورته سړې خونې او زېرمتونونه جوړیږي، د کرنې وزارت له خوا ددغو سړوخونو او زېرمتونونو د جوړېدو هرکلۍ کوي او هیله مند دي، چې ددغو پروژو په جوړېدو سره کروندګر د مناسبو سړوخونو او زېرمتونونو خاوندان شي او د دوی د حاصلاتو د خوڅاکېدو او مالي زیانونو مخه ونیول شي.
د ارزګان ولایت د خېرو کاریز یو تن بزګر امان الله وایي: «زه د کرنې له وزارت څخه مننه کوم، چې بزګرانو سره مرسته کوي. زه د پیازو کروندې لرم او د کرنې وزارت له خوا راته د پیازو زېرمتون جوړیږي، ددې زېرمتون په جوړېدو سره به زما د پیازو د خرابېدو مخه ونیول شي او پیاز به مې په ښه بیه وپلورل شي.» امان الله وویل، چې یوازې دی نه بلکه ټول بزګران د پیازو او کچالو زېرمتونونو جوړولو ته خوښ دي، ځکه چې مخکې کلونونو کې د دوی نیم او یا درېیمه برخه پیاز خوڅا کېدل، سږکال په دې خوښ دي، چې دکرنې وزارت له خوا ورته سړې خونې او زېرمتونونه جوړیږي، چې د دوی محصولات به په کې خوندي شي.
د کرنې، اوبولګولو او مالدارۍ وزارت د کرنیزو محصولاتو مدیریت د پروژې په اډانه کې د ارزګان په ولایت کې ۵۷ پروژې پلي کوي، چې رغنیزې چارې یې روانې دي او ډېر ژر به ګټې اخیستنې ته وسپارل شي.
