بامیان کې د مڼو د ۱۰ سړوخونو رغنیزې چارې ډېر ژر بشپړیږي
۲۲ تله ۱۳۹۹
د بامیانو په ولایت کې د مڼو د ۱۰ سړوخونو رغنیزې چارې ۸۵ سلنه بشپړ شوي دي.
دغه سړې خونې، د کرنې وزارت د کرنیزو محصولاتو مدیریت د برنامې په اډانه کې جوړیږي.
یاد سړې خونې د بزګرانو په لس سلنې ونډې سره د ۲۶ میلیونه افغانیو په لګښت د بامیان ولایت په مرکز او ولسوالیو کې جوړیږي.
دغه سړې خونې هر یوه یې د ۲۵ مټریک ټنه مڼو د ساتنې وړتیا لري.
د کچالو ترڅنګ مڼې هم د بامیان عمده کرنیز محصولات دي. روان کال په بامیان کې نږدې ۳۰ زره ټنه مڼې تولید شوي دي.
دغه سړې خونې، چې نوي جوړیږي کولای شي، چې د بامیان ولایت د بڼوالو ۲۵۰ مټریک ټنه اضافي مڼې خوندي وساتې او کله چې په بازار کې مڼو ته د خلکو تقاضا زیاته شوي بازار ته یې وړاندې کړي، چې د بڼوالو د عوایدو د زیاتوالي لامل کیږي.
