د هلمند د کرنې ریاست نوی رییس په رسمي ډول معرفي او خپله دنده یې پیل کړه

۱۷ زمری ۱۴۰۵ هـ.ش
۲۴ صَفَر المُظَفَّر ۱۴۴۸ هـ.ق 
د هلمند ولایت د کرنې، اوبولګولو او مالدارۍ ریاست د نوي رییس، قاري محمدنسیم «عبدالرحمن» د معرفي په موخه غونډه ترسره شوه، چې په کې د کرنې وزارت یوشمېر چارواکو، د بېلابېلو ادارو رییسانو، علماوو کرامو، د کرنې ریاست آمرینو او کارکوونکو او ګڼو مجاهدینو ګډون کړی و.
په دې غونډه کې د کرنې، اوبولګولو او مالدارۍ وزارت مالي او اداري چارو مرستیال مولوي نورالدين عمير، د عشر او زکات د تنظیم لوی رییس مولوي ندا محمد عابد، د هلمند ولایت امنیه قوماندان، د ولایت مقام د دفتر رییس، د هلمند پخواني او د نیمروز اوسني عدلیې رییس، د بېلابېلو ادارو رییسان، د کرنې ریاست مسؤولین او کارکوونکي او یو شمېر علماوو او قومي مخورو ګډون کړی و.
غونډه د اړوندو مسؤولینو د ویناوو په ترڅ کې ترسره شوه. په پیل کې مولوي محمد محمدي اصلاحي وینا وکړه او د ادارې مسؤولینو او کارکوونکو ته یې سپارښتنه وکړه چې خپلې چارې د اتحاد، اتفاق، همغږۍ او اخلاص په روحیه ترسره کړي.
نوموړي ټینګار وکړ چې د اسلامي نظام تر چتر لاندې باید د هېوادوالو، په ځانګړي ډول د بزګرانو او مالدارانو، ستونزو ته پر وخت رسېدنه وشي او خلکو ته د اړتیا وړ خدمات په ښه او اغېزمن ډول وړاندې شي.
ورپسې د هلمند ولایت مقام د دفتر رییس خبرې وکړې. نوموړي وویل چې په دولتي ادارو کې بدلونونه او تبدیلۍ د چارو د لا ښه والي، سمون او پرمختګ په موخه ترسره کېږي. هغه د نوي رییس د ټاکنې هرکلی وکړ او قاري محمدنسیم «عبدالرحمن» ته یې د نوې دندې په ترسره کولو کې د لا زیاتو بریاوو او هېوادوالو ته د غوره خدمتونو د وړاندې کولو توفیق وغوښت.
قاري محمدنسیم «عبدالرحمن» له اوږدې او ارزښتناکې جهادي سابقې برخمن دی او تر دې وړاندې یې د هلمند ولایت د صنعت او سوداګرۍ د رییس په توګه دنده ترسره کړې ده.
نوموړی د ریاست‌الوزراء د عالي مقام د حکم پر بنسټ د هلمند ولایت د کرنې، اوبولګولو او مالدارۍ ریاست د رییس په توګه ټاکل شوی او په یاده غونډه کې په رسمي ډول معرفي شو او خپله دنده یې پیل کړه.
د غونډې په پای کې ګډونوالو د هلمند ولایت د کرنې، اوبولګولو او مالدارۍ ریاست نوي رییس ته د بریالیتوب، د چارو د لا ښه والي او هېوادوالو ته د لا غوره خدمتونو د وړاندې کولو په موخه دعا وکړه او غونډه په دعائیه وینا پای ته ورسېده.