د کندهار تخته پُل د ۲.۷ میلیونه افغانیو په لګښت د یوه چکدېم د جوړېډو چارې بشپړې شوې
۲۲ سلواغه ۱۴۰۳ه.ش
۱۱ شَعبان المُعَظّم ۱۴۴۶ه.ق
د کندهار د تخته پُل ولسوالی د اکاخېل په سیمه کې د ۲.۷ میلیونه افغانیو په لګښت د یوه چکډېم د جوړېډو چارې بشپړې او ګټې اخیستنې ته وسپارل شو.
د کندهار دکرنې ریاست چارواکي وایي، چې یاد چکډېم د اسلامي امارت د پراختیایي بودیجې له لارې د تخته پُل ولسوالی د اکاخېل په سیمه کې جوړ شوی دی.
د کندهار دکرنې ریاست چارواکي زیاته کړې، چې یاد چکډیم ۱۰۴ متره اوږدوالی او ۵.۵ متره لوړوالی لري، چې د زرګونه متره مکعبه اوبو د ذخیره کولو وړتیا لري او چارې یې د څو میاشتو په موده کې بشپړې شوې دي.
د تخته پُل ولسوالی سیمه ییزو چارواکو د یاد چکډېم په جوړولو خوښي ښودلې او ویلي یې دي چې په دې سره به د سیمې اوسېدونکو ته د اوبو، کرنې او نورو برخو کې ګڼې اسانتیاوې رامنځته او په راتلونکي کې د ورته نورو پروژو د پلې کېدو ډاډ ورکړ.
ورته مهال د سیمې اوسېدونکو د یاد چکډېم په جوړېدو خوښي ښودلې او وایي، چې د دغه چکډيم په جوړېدو سره به د کارېزونو اوبه زیاتې او د کرنې په برخه کې ورته ګڼې اسانتیاوې رامنځته شي
د یادونې وړ ده، چې د روان کال په اوږدو کې، تر دې دمه، د عالیقدر امیر المؤمنین (حفظه الله تعالی) د حکم پر اساس، د کندهار په ۹ ولسوالیو کې د اوبو زېرمه کولو ۱۱ چکډېمونه جوړ او ګټې اخیستنې ته سپارل شوي دي.
