ننګرهار: د ولسوالیو ترویج مدیرانو سره د ستونزو حل او همغږۍ په موخه ناسته ترسره شوه
د ننګرهار د کرنې، اوبو لګولو او مالدارۍ رییس مولوي محمد ولي محسن د ۲۲ ولسوالېو عمومي مدیرانو سره د ستونزو حل، کارونو کې روڼتیا او ښې همغږۍ په موخه وکتل.
ښاغلي محسن مدیرانو ته وویل: «پخپلو ولسوالیو کې د بزګرانو او مالدارانو ته صادقانه خدمت وکړئ او هم په کارونو کې روڼتیا، دفترونو پاک ساتل، حاضرۍ پابندي، د مؤسساتو د کارونو څارنه، د ولسوالی او کرنې ریاست مسؤلینو سره همغږۍ کولو ته جدي پاملرنه وکړئ.»
په ورته وخت کې د کرنیزو خدمتونو امر نعمت الله اکبري هم خبرې وکړې او په ولسوالیو کې دغنمو، بڼوالۍ، صنعتي نباتاتو، ګل موتیا او شولو ننداریزو کروندو پر ترویج ټینګار وکړ.
دغه راز مدیرانو هم خپلې ستونزې، غوښتنې او وړاندیزونه د ننګرهار د کرنې رییس سره شریکې کړې، چې کرنې رییس له لورې د همکارۍ او ستونزو حل ډاډ ورکړل شو.
