۴ وږی ۱۳۹۹

د پنجشیر د کرنې، اوبولګولو او مالدارۍ ریاست وایي، په دې ولایت کې چې د کرنیزو محصولاتو مدیریت د برنامې له لارې د ۷۶ نویو کرنیزو پروژو چارې پیل شوې وې رغنیزې چارې یې تر ۴۰ سلنه بشپړ شوي دي.

دغه پروژې د پنجشیر ولایت د مرکز ترڅنګ ددې ولایت په ابشار، دره، عنابه، شتل، پریان، رخه او خینج ولسوالیو کې پلي کیږي.

د پنجشیر د کرنې ریاست د ترویج لوی مدیر عبدالرشید میثاق وایي: «د پنجشیر په ولایت کې په ټولیزه توګه د کچالو ۵۰ زېرمتونونه، د پیازو ۹ زېرمتونونه او د مېوو د ساتنې په پار ۷ سړې خونې جوړیږي، چې رغنیزې چارې یي تر ۴۰ سلنه بشپړ شوي دي او ترڅنګ یې په دې ولایت کې پر یوشمېر بزګرانو دمېوو او سبو لس لمریز وچوونکي دستګاوې هم وېشل کیږي.»

ددغو پروژو د پلي کېدو ټولیز لګښت ۵۰ میلیونه او ۵۰۰ زره افغانیو ته رسیږي.

د پنجشیر د دویمې حصې ولسوالۍ اړوند د «عبدالله خېلو درې» یو تن بزګر شاه‌ولي، چې ورته د پیازو یوه زېرمتون جوړیږي، د نویو کرنیزو پروژو د پلي کېدو هرکلۍ کوي او وایي: «حکومت له موږ سره زړه سوي کوي او موږ ته د پیازو زېرمتون جوړوي، مخکې مو چې حاصل راټولول ژر به مو خرڅول، ددې لپاره چې دا وېره راسره وه، چې حاصل مي خراب نه شي، ددې لپاره چې خوڅا نه شي ژر به مو خرڅ کړل. اوس یې په دې زېرمتون کې ساتو او په مناسب وقت او مناسبه بیه یې خرڅوو.»

شاه‌ولي ته چې د پیازو کوم زېرمتون جوړیږي، په کې شپږ کسان په دندو بوخت دي.