هلمند کې د ۲۰۰ زره ډالرو په لګښت د چرګانو او کبانو دانې د تولید فابریکه فعاله شوه
۲۰ غویی ۱۴۰۳ه.ش
۳۰ شَوّال المُکَرَّم ۱۴۴۵ه.ق
د هلمند ولایت د مرکز لښکرګاه ښار په «بېټون» سیمه کې د نږدې ۲۰۰ زره ډالرو په لګښت د چرګانو او کبانو دانې د تولید یوې کارخونې فعالیت پیل کړ.
یاده فابریکه په یو ساعت کې د درې ټنه اومه موادو د پروسس وړتیا لري، چې په معیاري ډول او مناسبه بیه فارم لرونکو ته د چرګانو او کبانو دانې برابروي او ورسره به د دانې بیې د پام وړ راټیټې او ترڅنګ یې د سوېل لویدیځ زون په کچه به د چرګانو او کبانو فارم لرونکو ته به معیاري دانې برابرې او د بې کیفیته وارداتو مخه به ورسر ونیول شي.
د هلمند ولایت دکرنې، اوبولګولو او مالدارۍ ریاست د چارواکو په خبره یاده کارخونه د نږدې ۲۰۰ زره امریکایې ډالرو په لګښت د یوکال په موده کې جوړه شوې، چې په کې سلګونو کسانو ته په مستقیمه او غیر مستقیمه توګه د کار زمینه برابره شوې ده.
د یادونې وړ ده، چې دې کارخونې ته ورته هلمند کې دوې نورې فابریکي هم فعالیت لري.
د کرنې، اوبولګولو او مالدارۍ وزارت لخوا د خصوصي سکټور پانګوالو ته په ګڼو برخو کي اسانتیاوې رامنځته شوي دي، ترڅو دوی وهڅېږي، چې په خپل هېواد کي پانګونه وکړي او له لارې یې هېوادوالو ته د کار زمینه برابره او هېواد پرځان بسیاشي.
