زابل کې د انارو د تولیدوونکو ټولنه جوړه شوه
۲۳ تله ۱۳۹۸
د زابل د شهر صفا ولسوالۍ د انارو تولیدوونکو، په دې ولسوالۍ کې د انارو د حاصلاتو د ډېروالي او په خپلو چاروکو د ښه همغږی په پار ۱۵۰ کسیزه ټولنه جوړه کړه.
دغه ټولنه دکرنې ریاست او د بڼوالۍ او مالدارۍ ملي برنامې په مرسته جوړه شوې ده. د انارو تولیدوونکو ټولنه له دغو بڼوالو سره مرسته کوي، چې ملي او نړیوالو مارکیټونو ته لار پیدا کړي.
ددې ټولنې په جوړېدو سره به د شهرصفا ولسوالۍ د انارو ټول تولیدوونکي سره همغږي شي او له دې لارې په مارکیټ کې د رقابت ځواک پیداکوي.
شهر صفا د زابل ولایت له هغو ولسوالیو څخه ده، چې د انارو ډېر شمېر بڼونه لري او ددې ولایت ډېر شمېر انار له همدې ولسوالۍ څخه په لاس راځي.
