خوست کې د شولو ننداریزو کروندو ښه حاصل؛ بزګرانو ته نوې لارښوونې وړاندې شوې
د خوست ولایت د کرنې، اوبو لګولو او مالدارۍ ریاست د علېشیرو او تریزیو ولسوالیو کرنیزو چارو عمومي مدیریت کارکوونکو د شولو ننداریزو کروندو څخه څارنه وکړه.
د څارنې پر مهال څرګنده شوه، چې د شولو ننداریزې کروندې د علېشیرو او تریزیو ولسوالیو په کروندو کې د پام وړ حاصل لري او بزګرانو ته د عملي زدهکړو لپاره یوه ښه تجربه برابروي. کارکوونکو بزګرانو ته د حاصل د راټولولو، د تخم د صفایې، ساتنې او خوندیتوب په اړه مهمې لارښوونې وکړې.
د خوست دکرنې ریاست چارواکي وایي، دغه څارنه د ریاست د لارښوونو او کلني پلان پر بنسټ ترسره شوې، څو بزګران د شولو کرنې په برخه کې له نوو لاروچارو او اغېزمنو عملي تجربو څخه ګټه واخلي او د خپلو تولیداتو کچه لوړه کړي.
