بغلان کې په ۳۴۴ بېوزله مېرمنو د چرګانو پالنې وړې فارمونه ووېشل شول
۲۲ غبرګولی ۱۴۰۰
د بغلان دکرنې، اوبولګولو او مالدارۍ ریاست د خلکو په ګډون دک رنې او مالدارۍ پروژې «CLAP» له لارې ددې ولایت په ۳۴۴ بېوزله او کونډو مېرمنو د چرګانو روزنې ۳۴۴ واړه فارمونه وېشلي دي.
دغه واړه فارمونه چې د مرکزي بغلان، دوشي، بنو اندرآب او ده صلاح په ولسوالیو کې پر بېوزله او کونډو مېرمنو وېشل شوي دي، په کې ۶۰ دهګیو چرګان، شپږ دانې آب خوره، شپږ دانې دانه خوره، د چرګانو ۵۶۶ کیلو دانې او د اړتیا وړ واکسینونه شامل دي.
د بغلان دکرنې رییس عبدالغیاث صدیقي وایي، چې په بېوزله مېرمنو د چرګانو پالنې د یادو وړو فارمونو د وېش موخه په دې ولایت کې د چرګانو پالنې د صنعت دودول او د یادو مېرمنو د اقتصادي وضعیت ښه کولو په پار مرسته ده. ښاغلی صدیقي وایي، چې د یادو فارمونو وېش برخمنو مېرمنو ته د ښه کاري بوختیاوې زمینه برابروي.
له دغو فارمونو برخمن شوې مېرمنې د بغلان د کرنې ریاست دغه ګام ستایي او ترې مننه کوي.
