د پکتیکا دکرنې ریاست: پر ۲۱ زره او ۴۰۰ بېوزله کورنیو خوراکي توکي ووېشل شول
د پکتیکا دکرنې، اوبولګولو او مالدارۍ ریاست د «او،آر،ډي» مؤسسې په همکارۍ ددې ولایت په ۲۱ زره او ۴۰۰ بېوزله کورنیو اړین خوراکي توکي وېشلي دي.
د چارواکو په خبره د پکتیکا ولایت د مرکز شرنې په ګډون ددې ولایت د سروضې، زېړوک، یحی خېل، جاني خېل، خیرکوټ او یوسف خېلو ولسوالیو پر ۲۱ زره او ۴۰۰ بېوزله کورنیو اړین خوراکي توکي وېشل شوي دي.
ددې مرستې په لړ کې هرې کورنۍ ته ۵۰ کیلو اوړه، ۵ لیټره غوړي، یو من دال، یوه کیلو ګرامه مالګه او د ماشومانو لپاره د خوارځواکۍ د مخنیوي توکي وېشل شوي دي.
باید وویل شي، چې دا شپږم ځل دی، چې په دې ولایت کې پر بېوزله کورنیو خوراکي توکي وېشل کېږي، چې ۷۰ سلنه یې د کار په بدل کې ورکول کېږي.
