د ننګرهار کانال رياست روغتيايي کلينيک سره د طبي او غیر طبي توکو مرسته وشوه

۱۹ وږی ۱۴۰۱ه‍.ش
۱۳صَفَرالمظفّر ۱۴۴۴ ه‍.ق
د ننګرهار کانال رياست اړوند د هډې فارم روغتیايي کلینیک سره  د (JHPIEGO)  مؤسسې له لورې د 34 قلمه اړينو توګو مرسته وشوه.
 په مرسته شويو توکو کې د 250 زره افغانیو په ارزښت طبي درمل او د 70 زره افغانيو په ارزښت کارېدونکي دفتري جنسونه لکه چوکۍ، ميزونه المارۍ، کثافتدانۍ، ترموزونه او نور شامل دي. 
دغه مرسته د یادې مؤسسې مرستیال ډاکتر نورحسن شېرزاد او د ننګرهارکانال ریاست رییس مولوي غلام الرحمن په حضور کې  ددغې روغتیايي کلینک مسوول ډاکتر سید انور سادات ته وسپارل شوه.
د ننګرهار وادي کرنیزریاست رییس مولوي غلام الرحمن د یادې مؤسسې له شوی مرستې مننه وکړه او ويې ویل : «موږ مو ډېر کم خدمت اوهمکارۍ ته هم د قدر په سترګه ګورو، ستاسو د مرستو له برکته زموږ د روغتیايي کلینک کارونه لا منظم او چټک شوي او دې روغتيايي کلينيک ته د  مراجعینو راتګ زیات شوی».
د ننګرهار وادي کرنیز ریاست رییس وویل:«د هډې فارم اړوند روغتیايي کلینک ډېر کار ته اړتیا لري او اړینه ده چې دغه کلینیک ټول ملحقات لکه د انتظارخونه، چمن، مجهز کتنځایونه، تشنابونه، درمل او نور اړينې برخې يې سمبال شي.»
د یادونې ده، چې د هډې فارم په دې روغتیايي کلینیک کې اوس مهال د نسايي ولادي، واکسین، داخله، لابراتوار، تبرکلوز، کرونا، مور او ماشوم، غاښونو، جراحي او نورو برخو کې د پنځه تنه ښځینه ډاکترانو او  6 تنو نارینه ډاکترانو په واسطه هېوادوالو ته چوپړتیاوې وړاندې کېږي.