دکرنې وزارت مسلکي مرستیال د مطبوعاتي کنفرانس له لارې د ځنګلونو د خوندیتوب طرحه بیان کړه
۷ چنګاښ ۱۴۰۱ ه.ش
۲۹ ذوالقعده ۱۴۴۳ ه.ق
دکرنې، اوبولګولو او مالدارۍ وزارت دکرنې او مالدارۍ مرستیال مولوی صدراعظم عثماني، د ننګرهار په ولایت کې د ننګرهار د سیمه ییزو چارواکو او د ختیځو ولایتونو د یوشمېر چارواکو په ګډون د رسنیز کنفرانس له لارې د ځنګلونو د خوندیتوب طرحه تشریح او د سیمه ییزو چاراکو له خوا د یادې طرحې د جدي تطبیق غوښتنه وکړه.
مولوی صدراعظم د ځنګلونو پرېکول او د لرګیو قاچاق غیر قانوني وبلله او ویې ویل: «ځنګلونه د دولت ملکیت دی، او هیڅ څوک ددې حق نه لري، چې له ځنګلونو څخه په شخصي توګه ګټه پورته کړي.»
هغه د ختیځو ولایتونو له سیمه ییزو چارواکو څخه وغوښتل، چې د ځنګلونو د خوندیتابه طرحه دې په جدي توګه تطبیق کړي او له سرغړوونکو سره قانوني چلند وکړي.
دغه راز ددې کنفرانس په ترڅ کې، دکرنې وزارت د اطلاعاتو او عامه پوهاوی رییس مولوی مصباح الدین مستعین له خوا د ځنګلونو د خوندیتوب د ۱۱ ماده ییز طرحې په هکله چارواکو او خبریالانو ته بشپړ معلومات وړاندې شول.
یاده طرحه چې په ګډه د کرنې، ماليې، کورنيو چارو، صنعت او سوداګرۍ وزارتونو او د استخباراتو لوی رياست له خوا جوړه شوې او د اسلامي امارت د رهبرۍ له خوا تصویب شوې ده، په کې د چهار تراش د لرګیو قاچاق په بشپړ ډول منع شوې او په هېواد کې د ننه د چهار تراش لرګیو د لېږد، د لرګیو صنعت کارانو له خوا له لرګیو څخه د استفادې څرنګوالی بیان او پر یادو لرګیو د مالیې کچه ټاکل شوی دی.
