په بېوزله مېرمنو د چرګانو پالنې د ۳۲۱۶ کڅوړو د وېش لړۍ پیل شو
۱۵ چنګاښ ۱۴۰۰
د کرنې، اوبولګولو او مالدارۍ وزارت د هېواد په اوو ولایتونو کې په بېوزله مېرمنو د چرګانو پالنې د درې زره او ۲۱۶ کڅوړو د وېش لړۍ پیل کړی دی.
د کرنې وزارت له خوا د خلکو په ګډون د کرنې او مالدارۍ پروژې «CLAP» له لارې نن ددغو کڅوړو د وېش لړۍ رسماً پیل شو.
د یادو کڅوړو په وېش غونډه کې د کرنې وزارت د کرنې او مالدارۍ مرستیال شېرشاه امیري وویل، چې د هېواد په اوو ولایتونو کې په هغو بېوزله مېرمنو چې مخکې سروې شوي دي، د چرګانو پالنې درې زره او ۲۱۶ کڅوړې وېشل کېږي. هغه زیاته کړه، چې د چرګانو پالنې د کڅوړو وېش د بېوزله مېرمنو د کورنیو د خوړو خوندیتوب، د کوچنیو دندو د فرصتونو ایجادول او د دوی د اقتصادي وضعیت د ودې لامل کېږي.
د چرګانو پالنې له کڅوړو څخه برخمن شوې مېرمنې د کرنې وزارت له مرستو خوښي څرګوندوي.
یوتن برخمن شوې کس هدیه وایي، چې د چرګانو پالنې د کڅوړې په ترلاسه کولو سره به یې په ژوند کې لوی بدلون رامنځته شي؛ ځکه د هغه په خبره په کورنیو بازارونو کې وطني هګۍ دانه په ۱۰ تر ۱۲ افغانیو خرڅېږي.
یوتن بل برخمن شوې کس رحیمه وایي، چې د هګیو په پلور سره کولای شي، چې د خپلو ماشومانو د ښوونځي لګښتونه تامین کړي او د خپلې کورنۍ اقتصادي ودې سره مرسته وکړي.
د یادونې وړ ده، چې د چرګانو پالنې په هر کڅوړه کې ۶۰ قطعې څلور میاشتنۍ چرګوړي، چرګانو ته د دانې ورکولو شپږ لوښې، د اوبو ورکولو شپږ لوښې او د چرګانو ۶۷۵ کیلوګرامه خوراکي توکي شامل دي.
