د ملگرو ملتونو د خوړو او کرنې ادارې په غونډه کې د کرنې وزارت د مرستیال ګډون

۲۵ غبرګولی ۱۴۰۰
د کرنې، اوبولګولو او مالدارۍ وزارت د کرنې او مالدارۍ مرستیال شېرشاه امیري، د ملګرو ملتونو د خوړو او کرنې ادارې «FAO» او مرستندویو هېوادونو په ۴۲ مه غونډه کې د ویډیو کنفرانس له لارې ګډون وکړ.
دا غونډه، چې د غذایي مواد د تامین پر څرنګوالي د خبرو اترو په موخه جوړه شوې وه، په کې ښاغلی امیري وویل: «۳۳ سلنه افغانان د خوړو له نشتونه کړېږي، له پنځو کلونو ښکته ۴۰ سلنه ماشومان د خوارځواکۍ په ستونزو اخته دي او ۵۵ سلنه هم د بېوزلۍ تر کرښې لاندې دي.»
شېرشاه امیري د افغانستان د کرنې په برخه کې د ملګرو ملتونو د خوړو او کرنې ادارې «FAO» له فعالیتونو او مرستو څخه د مننې ترڅنګ وویل، چې بېوزلۍ او خوارځواکۍ سره د مبارزې په پار افغانستان د اوبولګولو، د کرنیز، بڼوالۍ او مالدارۍ محصولاتو د سیسټمونو د پیاوړتیا او د طبي نباتاتو د مرکزونو جوړولو په پار د ملګرو ملتونو د خوړو او کرنې ادارې مرستې او همکاریو ته اړتیا لري.