د هرات د نیالګیو اېښودو په سږني کمپین کې به څه باندې ۶۰ زره نیالګي کېنول شي

۱۹ سلواغه ۱۳۹۹
د ګذرې ولسوالۍ د پشتون پل په سیمه کې د نیالګیو اېښودو کمپاین د ولایت د مقام مرستیالې محنسه حسن‌زاده، د کرنې رییس عبدالصبور رحماني، د چاپېریال ساتنې رییس نصیر احمدفضلي، د کرنې ریاست د یوشمېر همکارانو، د رسنیو استازو او دغه راز بزګرانو په شتون کې رسماً پیل شو.
د هرات دکرنې رییس عبدالصبور رحماني وایي: «ددې کمپین په ترڅ کې ټاکل شوې، چې د ولایت د مقام د ونډې پر اساس به پر امنیتي ارګانونو، ۱۹ ولسوالیو او دولتي اداراتو د زرغونتیا او د هوا د ککړتیا سره د مبارزې په پار څه باندې ۶۰ زره تزئیني، مثمر او غیر مثمر نیالګي ووېشل شي او کېښودل شي.»
د نیالګیو اېښودو کمپین د هرات ولایت د کرنې ریاست له خوا هرکال د سمسورو او زرغونو سیمو د ایجادولو او د هوا د ککړتیا د مخنیوي په پار په لاره اچول کېږي.
د نیالګیو اېښودو د کمپین په پرانیست غونډه کې د هرات د کرنې رییس له خلکو غوښتنه وکړه، چې د نیالګیو د خوندیتوب او دغه راز ددې لړۍ د پیاوړتیا په برخه کې ډېره ونډه واخلي.
ددې کمپین په ترڅ کې د هرات دکرنې ریاست به په خپلو اړوندو سیمو کې، نږدې ۲۰ زره نیالګي غرس، خړوبه او خوندي کړي.
هرات کې د نیالګیو اېښودو کمپین هرکال د سلواغې په ۱۵ پیل او د وري تر دویمه دوام کوي.