نورستان کې۵۰۰ مېرمنو ته د کار زمينه برابره شوې
د نورستان ولایت د کرنې، اوبولګولو او مالدارۍ ریاست چارواکي وایي، چې په یاد ولایت کې ۵۰۰ مېرمنو ته د کرکېلي په برخه کې په کور د ننه د کار کولو زمينه برابره شوې ده.
د نورستان دکرنې ریاست وایي، چې په دې ولایت کې مېرمنو ته د کورنیو باغچو په جوړولو، پر دوی د کورنیو باغچو د اړوندو توکو وېش، د بېلابېلو سبو تخمونو په وېش او ترڅنګ یې په کورنیو باغچو کې د کرکېلي د لارو چارو او د سبو د پروسس د لاروچارو په ښودلو سره ۵۰۰ مېرمنو ته د کارزمینه برابره شوې ده.
په ورته وخت کې د نورستان د کرنې ریاست له خوا مېرمنو ته د زعفرانو کښت او راټولو او د سبو او ترکاریو د کرکېلي عملي او نظري روزنیزې برنامې هم په لاره اچول شوي دي ترڅو دوی په کور د ننه په کار بوختې شي او د خپلې کورنۍ اړتیاوې پوره کړي.
له دغو وېشل شویو کورنیو باغچو څخه موخه خوراکي خوندیتوب رامنځته کول، د کلیوالو بېوزلو کورنیو اقتصادي وده، د بېوزلی کچه ټېټول او مېرمنو لپاره د کار زمینې برابرول دي.
